நீட் வினாத்தாள் கசிவைக் கண்டித்து கரப்பான்பூச்சி கட்சி சார்பில் கடந்த ஜூன்,ஜூலையில் டெல்லி
ஜந்தர் மந்தரில் மிகப்பெரிய போராட்டம் நடத்தப்பட்டது.இதன்காரணமாக ஒன்றிய கல்வியமைச்சர் பதவியிலிருந்து தர்மேந்திர பிரதான் விலகினார்.
இப்போது,எஸ்ஐஆர் சிக்கல் தொடர்பாக தலைமைத் தேர்தல் ஆணையர் ஞானேஷ்குமார் பதவி விலகவேண்டும். இல்லையென்றால் அக்டோபர் 10 ஆம் தேதி முதல் டெல்லியில் காலவரையற்ற போராட்டம் தொடங்கப்படும் என்று சிஜேபி அறிவித்தது.
இதைத்தொடர்ந்து டெல்லியில் பலத்த பாதுகாப்பு ஏற்பாடுகள் செய்யப்பட்டு உள்ளன.டெல்லி காவல்துறையைச் சேர்ந்த 15,000 காவல்துறையினரும்,ஒன்றிய பாதுகாப்புப் படைகளைச் சேர்ந்த 23,000 வீரர்களும்
குவிக்கப்பட்டுள்ளனர்.ஒட்டுமொத்தமாக 38,000 வீரர்கள் டெல்லியில் பாதுகாப்புப் பணியில் ஈடுபட்டுள்ளனர்.
நாட்டின் பல்வேறு பகுதிகளில் இருந்து டெல்லிக்கு இயக்கப்படும் 13 விரைவு தொடர்வண்டிகள் இரத்து
செய்யப்பட்டு உள்ளன.
கிழக்கு தொடர்வண்டி நிர்வாகமும் சில விரைவு வண்டிகளை இரத்து செய்திருக்கிறது.வெளிமாநிலங்களில் இருந்து டெல்லிக்கு வரும் பேருந்துகள் தீவிரமாகக் கண்காணிக்கப்படுகின்றன.டெல்லி மற்றும் புறநகர்ப்பகுதி விடுதிகளில் தங்கியிருப்போர் குறித்து விசாரணை நடத்தப்படுகிறது.டெல்லியை ஒட்டிய அண்டை மாநிலங்களின் எல்லைகளில் தீவிர சோதனை நடத்தப்படுகிறது. டெல்லியின் 57 மெட்ரோ நிலையங்கள் இன்று முழுமையாக மூடப்படும் என்று அறிவிக்கப்பட்டது.
போராட்டத்தில் பங்கேற்கும் சிஜேபி தொண்டர்களை தடுப்புக் காவலில் வைக்க திருமண மண்டபங்கள்,
மைதானங்கள் தயார் நிலையில் வைக்கப்பட்டுள்ளன. முன்வரிசை பாதுகாப்புப் பணியில் ஈடுபடும் காவல்துறையினரின் உடைகளில் ஒளிப்பதிவுக்கருவி பொருத்தப்பட்டிருக்கிறது. சிஜேபி அமைப்பின் 10,000 நிர்வாகிகள் தடுப்புக் காவலில் வைக்கப்பட்டுள்ளனர்.
டெல்லி காவல்துறை இணை ஆணையர் நுபுர் பிரசாத் நேற்று கூறும்போது,போராட்டம் நடத்த 10 நாட்களுக்கு முன்பே மனு அளிக்கவேண்டும்.ஆனால் மிக குறுகிய காலத்தில் சிஜேபி மனு அளித்திருக்கிறது.சட்டம்,ஒழுங்கு காரணமாக போராட்டம் நடத்த அனுமதி வழங்கப்படவில்லை என்று தெரிவித்தார்.
டெல்லியில் நிலவும் அசாதாரண சூழல் காரணமாக பள்ளி, கல்லூரிகளில் இன்று இணைய வாயிலாக வகுப்புகள் நடத்தப்படும் என்று பெரும்பாலான கல்வி நிறுவனங்கள் அறிவித்துள்ளன.ஜந்தர் மந்தரின் பல்வேறு பகுதிகளில் ஒலிபெருக்கிகள் அமைக்கப்பட்டு உள்ளன.இந்த வளாகத்தில் யாரும் ஒன்றுகூட வேண்டாம் என்று ஒலிபெருக்கிகள் மூலம் தொடர்ச்சியாக அறிவிப்பு வெளியிடப்படுகிறது.
இதனால் ஒட்டுமொத்த டெல்லியிலும் பெரும் பரபரப்பு நிலவிவருகிறது.
