தலைமைத் தேர்தல் ஆணையர் ஞானேஷ்குமார் பதவி விலகவேண்டும். இல்லையென்றால் அக்டோபர் 10 ஆம் தேதி முதல் டெல்லியில் காலவரையற்ற போராட்டம் தொடங்கப்படும் என்று சிஜேபி அறிவித்தது.அதன்படி, கரப்பான்பூச்சி ஜனதா கட்சி,இடதுசாரி மாணவர் இயக்கம் உள்ளிட்ட பல்வேறு அமைப்புகள் இணைந்து டெல்லி ஜந்தர் மந்தரில் நேற்று போராட்டம் நடத்த இருந்தனர்.
இந்தப் போராட்டத்துக்கு டெல்லி காவல்துறை அனுமதி மறுத்தது.தடையை மீறிப் போராடுபவர்களை கைது செய்வதற்காக 4 ஆயிரம் பெண் காவல்துறையினர் உட்பட 14 ஆயிரம் காவல்துறையினர் டெல்லி முழுவதும் குவிக்கப்பட்டனர்.
தடையை மீறிப் போராட்டத்தில் ஈடுபட்டதாக மேற்கு வங்க முன்னாள் முதல்வர் மம்தா பானர்ஜி, டெல்லி முன்னாள் முதல்வர் அரவிந்த் கேஜ்ரிவால் உள்ளிட்டோர் கைது செய்யப்பட்டனர்.
ஜந்தர் மந்தர் போராட்டத்தில் கலந்து கொள்வதற்காக மம்தா பானர்ஜி உள்ளிட்ட அவரது கட்சியின் மூத்த தலைவர்கள் டெல்லி சவுத் அவென்யூவில் தங்கி இருந்தனர்.போராட்டத்தில் பங்கேற்க அவர்களுக்கு அனுமதி மறுக்கப்பட்டதால், நாடாளுமன்ற உறுப்பினர்களின் குடியிருப்புகளுக்கு அருகிலுள்ள இடத்தையே போராட்டக் களமாக மாற்றிக் கொண்டனர்.
‘ஜனநாயகத்தைக் காப்போம்; இந்தியாவைக் காப்போம்’ என்ற பதாகையை ஏந்தியவாறு மம்தா பானர்ஜி தனது கட்சியினர் சிலருடன் இணைந்து போராட்டத்தில் ஈடுபட்டார். இதையடுத்து,காவல்துறையினர் அவரை கைது செய்தனர்.
இதேபோல், ஜந்தர் மந்தருக்குச் செல்ல இருந்த அரவிந்த் கேஜ்ரிவாலை, டெல்லி லோதி எஸ்டேட்டில் உள்ள அவரது வீட்டிலேயே தடுத்து நிறுத்தி குண்டுக்கட்டாகத் தூக்கிச் சென்றனர்.நூற்றுக்கும் மேற்பட்ட ஆதரவாளர்களுடன் ஜந்தர் மந்தரை நோக்கி, பிரசாந்த் பூஷன், யோகேந்திர யாதவ், நேஹா போரா உள்ளிட்டோர் பேரணியாகச் சென்ற நிலையில் அவர்கள் அனைவரும் கைது செய்யப்பட்டனர்.
இதையடுத்து, போராட்டக் களம் ஜந்தர் மந்தருக்குப் பதிலாக டெல்லி ஹாட்டுக்கு மாற்றப்பட்டது. இதனை தனது சமூக ஊடக பக்கத்தில் வெளியிட்ட ஏஐஎஸ்ஏ தலைவர் நேஹா போரா, போராட்டம் நடத்த அனைவரும் அங்கு திரளுமாறு வேண்டுகோள் விடுத்தார்.
அதன்பின்,டெல்லி ஹாட் செல்லும் சாலைகளை மூடிய காவல்துறையினர், உள்ளே இருந்த சந்தையையும் மூட உத்தரவிட்டனர். மேலும்,அங்கே பொருட்கள் வாங்க வந்த பொதுமக்களையும் விரைவாக அங்கிருந்து வெளியேற்றினர்.
இதன் தொடர்ச்சியாக நேஹா போரா வெளியிட்ட மற்றொரு காணொலி பதிவில், எங்கே தடுக்கப்படுகிறீர்களோ அங்கேயே சாலையில் அமர்ந்து போராடுங்கள் என்று ஆதரவாளர்களுக்கு அழைப்பு விடுத்தார்.இதனால்,நகரின் அனைத்துப் பகுதிகளிலும் போராட்டம் நடக்கத் தொடங்கியது.அதைத்தொடர்ந்து தீவிர கண்காணிப்பை மேற்கொண்ட காவல்துறையினர், போராட முனைபவர்களை உடனுக்குடன் கைது செய்து தடுப்பு முகாம்களுக்குக் கொண்டு சென்றனர். இதனால், டெல்லியில் ஆங்காங்கே திடீர் திடீரென சிறு சிறு குழுக்களாக பலர் போராடுவதும் அவர்களை கைது செய்வதுமான சம்பவங்கள் நடந்தன.
நேற்று மட்டும் சுமார் பத்தாயிரத்துக்கும் மேற்பட்டோர் கைது செய்யப்பட்டதாகவும் தலைநகர் டெல்லி முற்றாக முடங்கியதாகவும் சொல்லப்படுகிறது.தடையை மீறி இவ்வளவுபேர் கைதாகியிருப்பது மோடி அரசுக்குப் பெரும் நெருக்கடியாக அமைந்திருக்கிறது என்கிறார்கள்.
