அரசு வழக்குரைஞர்கள் நியமன ஊழல் தொடர்பான வழக்கில் தவெக அரசை சென்னை உயர்நீதிமன்ற மதுரைக் கிளை சாடியிருக்கிறது.இதைத் தொடர்ந்து,ஊழலை மூடி மறைக்கமுயன்ற விஜய் சர்க்காருக்கு உயர்நீதிமன்றம் சவுக்கடி கொடுத்துள்ளது என்று திமுக அமைப்புச் செயலாளர் ஆர்.எஸ்.பாரதி கூறியுள்ளார்.
இது குறித்து அவர் வெளியிட்டுள்ள அறிக்கையில்….
ஊழலை ஒழிக்கும் உத்தம ஆட்சி போல வேடம் போட்ட தவெக அரசின் முகத்திரையை கிழித்துத் தொங்கவிட்டுள்ளது நீதிமன்றம்.
ஆட்சிக்கு வந்தவுடனே அரசு வழக்கறிஞர் நியமனத்தில் பார்ட்டி ஃபண்ட் வசூல் செய்யத் தொடங்கிவிட்டது தவெக அரசு என பல புகார்கள் எழுந்தன.அரசு வழக்கறிஞர் நியமனத்தில் 5 இலட்சம் முதல் 30 இலட்சம் வரை வசூலித்ததாக தவெகவைச் சேர்ந்த வழக்கறிஞர் ஞானசுந்தரி என்பவரே சென்னை உயர்நீதிமன்றத்தில் வழக்குத் தொடுத்தார்.
இந்த ஊழல் தொடர்பாக தமிழக இலஞ்ச ஒழிப்புத் துறை விசாரிக்கவேண்டும் என திமுக துணை அமைப்புச் செயலாளர் ப.தாயகம் கவி தமிழக இலஞ்ச ஒழிப்பு மற்றும் கண்காணிப்புத் துறையில் புகார் அளித்தார். ஆனால், ஊழலை ஒழிக்க வந்த உத்தமர்கள் செய்தது என்ன? புகார் அளித்த அந்த வழக்கறிஞரைக் கட்சியை விட்டு நீக்கிவிட்டு வழக்கை மூடி மறைக்கப் பார்த்தனர்.
சமீபத்தில் கன்னியாகுமரி மாவட்டத்தில் அரசு வழக்கறிஞர்கள் நியமனங்களுக்கு 15 இலட்சம் ரூபாய் வரை இலஞ்ச பேரம் நடத்திய தவெக நிர்வாகி அனீஸ் என்பவரது அதிர்ச்சி ஆடியோ வெளியானது.அது தொடர்பாக ஜெகன் ராஜ் என்பவர் தொடர்ந்த வழக்கில் சென்னை உயர்நீதிமன்ற மதுரைக் கிளை தவெக அரசை நன்றாய் வெளுத்துள்ளது.
இலஞ்சம் கொடுத்து வழக்கறிஞர்களாக வர வேண்டுமா? என்றும்,இவர்கள் நாட்டைக் காப்பாற்றுவார்களா அல்லது சட்டத்தைப் பாதுகாப்பார்களா? என்றும் கேள்வி எழுப்பி உடனடியாக இப்புகார் மீது தமிழ்நாடு இலஞ்ச ஒழிப்புத் துறை விசாரணை நடத்தவேண்டும் என உத்தரவிட்டுள்ளது நீதிமன்றம்.
அதோடு “அரசு வழக்கறிஞர் நியமன ஊழல் தொடர்பாக இலஞ்ச ஒழிப்புத் துறைக்கு முன்கூட்டியே புகார் அனுப்பப்பட்டும்,அவர்கள் ஏன் இன்னும் விசாரணையைத் தொடங்கவில்லை? புகார் வந்தால் விசாரிக்க மாட்டீர்களா? இலஞ்சம் தொடர்பான ஆடியோ ஆதாரங்கள் இருந்தும் ஏன் இன்னும் வழக்குப்பதிவு செய்து விசாரணை நடத்தவில்லை? என்றெல்லாம் இலஞ்ச ஒழிப்புத் துறையின் மந்தமான செயல்பாட்டை நீதிமன்றம் நேரடியாகச் சாடியிருக்கிறது.
ஊழலை மூடி மறைக்க முயன்ற விஜய் சர்க்காருக்கு உயர்நீதிமன்றம் சவுக்கடி கொடுத்துள்ளது.இந்த அரசு வழக்கறிஞர் நியமன ஊழல் மூலம் பல கோடி ரூபாய் வரை இலஞ்சம் பெறப்பட்டதாக செய்திகள் வருகின்றன. இந்த பலகோடி ரூபாய், தவெக பார்ட்டி ஃபண்டுக்கு வசூலிக்கப்பட்டதா? அதுபற்றி விசாரிக்குமா தமிழ்நாடு இலஞ்ச ஒழிப்புத் துறை.இதற்கு பொறுப்பான சட்டத்துறை அமைச்சர் வீட்டில் சோதனை செய்யுமா இலஞ்ச ஒழிப்புத் துறை?
தூயசக்தி என கொடுத்து வந்த பில்டப்பை காப்பாற்ற இலஞ்ச ஒழிப்புத் துறையை தவெகவின் கிளை அமைப்பாகப் பயன்படுத்தி வந்தனர்.ஆனால்,இன்று உயர்நீதிமன்ற மதுரைக்கிளை தூயசக்தியின் இலட்சணத்தை தோலுரித்துக் காட்டியிருக்கிறது.இவர்கள் தூய சக்தியல்ல,தவெக ஒரு திருட்டு சக்தி என்பது வெளிப்பட்டுள்ளது.
ஆர்எஸ்எஸ் நிர்மல்குமார் தேவையின்றி டேக் டைவர்ஷன் அரசியல் செய்தது எல்லாம் இந்த மெகா ஊழலை மறைக்கத்தானா? எந்தக் கேள்விக்கும் பதில் சொல்லாமல் அவதூறுகளை அள்ளிக்கொட்டி மக்களை மடைமாற்றும் அமைச்சர் நிர்மல்குமாரிடம் நீதிமன்றம் கேட்கும் கேள்விகளுக்குப் பதில் உண்டா?
உத்தமர் வேடம் போட்ட விஜய் சார் எங்கே போனார்? ஏன் அவர் அரசு வழக்கறிஞர் நியமன ஊழலைப் பற்றி புகார் வந்தவுடன் விசாரிக்கவில்லை? திமுக சார்பில் அளிக்கப்பட்ட புகாரை இனியாவது இலஞ்ச ஒழிப்புத் துறை விசாரிக்குமா? இல்லை அதற்கும் நீதிமன்றம் உத்தரவிடும்வரை காத்திருக்கப் போகிறீர்களா?
டேபிளில் ஃபைல் உள்ளது என கதை விட்டீர்களே.ஆனால் உண்மையில் நீதிமன்றத்தின் டேபிளில்தான் தவெகவினர் செய்துள்ள ஊழல் ஃபைல்கள் உள்ளன.அதில் ஒன்றை நீதிமன்றம் தற்போது ஓபன் செய்துள்ளது. விரைவிலே தவெக அரசின் ஊழல்கள் ஒவ்வொன்றாய் வெளிவரும்.
கள்வன் கையில் வீட்டுச் சாவியைக் கொடுத்த கதையாய் தற்போது தமிழகம் தவெக கையில் மாட்டியுள்ளது. விரைவில் இந்த அயோக்கியக் கூட்டத்துக்கு தமிழக மக்கள் தக்க பாடம் புகட்டுவார்கள்
இவ்வாறு அவர் கூறியுள்ளார்.
