வேதாந்தா நிறுவனத்துக்குக் கொடுத்த அனுமதி என்னவாயிற்று? – முதல்வருக்கு பெ.ம கேள்வி

காவிரி உரிமை மீட்புக்குழுவின் பேரவைக் கூட்டம் ஒருகினைப்பாளர் பெ.மணியரசன் தலைமையில் தஞ்சை அலுவலகத்தில் இன்று 17.03.2020 முற்பகல் நடந்தது. உரிமை மீட்புக்குழுவின் பொருளாளர் த.மணிமொழியன், தமிழர் தேசிய முன்னணி பொதுச்செயலாளர் மருத்துவர் இலரா.பாரதிச்செல்வன், விடுதலைத் தமிழ்ப்புலிகள் கட்சித்தலைவர் குடந்தை அரசன், தமிழக விவசாய சங்க தஞ்சை மாவட்டத் தலைவர் செகதீசன், இந்திய சனநாயகக் கட்சி தஞ்சை மாவட்ட தலைவர் சிமியோன் சேவியர்ராசு, தமிழ்த்தேசியப் பாதுகப்பு கழகத் தலைவர் வழக்கறிஞர் த.சு.கார்த்திகேயன், இந்திய யூனியன் முஸ்லிம் லிக் தஞ்சை மாவட்டத் தலைவர் ஜெயினுல்லாப்தின், தமிழ்த்தேசியப் பேரியக்கத் தஞ்சை மாவட்டச் செயலாளர் நா. வைகறை, தலைமைச்செயர்குழு உறுப்பினர் பழ.இராசேந்திரன், தஞ்சை மாநகர் செயலாளர் இலெ.இராமசாமி, மனித நேய சனநாயக மக்கள் கட்சி தஞ்சை மாவட்டத் தலைவர் அகமது கபீர், தமிழர் தேசிய முன்னணி திருவாருர் மாவட்டச் செயலாளர் ச.கலைச்செல்வன் உள்ளிட்டோர் கலந்து கொண்டனர்.

கீழ் வரும் தீர்மானங்கள் நிறைவேற்றப்பட்டன:

தீர்மானம் – 1

வேளாண் மண்டலத்திற்கு வரவேற்பு
வேதாந்தா அனுமதி பற்றி விளக்க வேண்டும்!

காவிரிச் சமவெளியைப் பாதுகாக்கப்பட்ட வேளாண்மண்டலமாக அறிவித்து தமிழ்நாடு அரசு சட்டம் இயற்றியதைக் காவிரி உரிமை மீட்புக்குழு பாராட்டுகிறது. காவிரி சமவெளியை மேம்படுத்துவதற்காக அறிவிக்கப்பட்டுள்ள குழுவை உடனடியாக அமைத்து, காவிரி வேளாண் மண்டலத்தை மேம்படுத்துமாறு தமிழ்நாடு அரசை காவிரி உரிமை மீட்புக்குழு கேட்டுக்கொள்கிறது.

ஓ.என்.ஜி.சி, ஐ.ஓ.சி போன்ற இந்திய அரசு நிறுவனங்களுக்கு ஐட்ரோகார்பன் எடுக்க 2016 முதல் கொடுக்கப்பட்ட அனுமதியை நீக்கிவிட்டதாகத் தமிழ்நாடு அரசு அறிவித்திருப்பது வரவேற்கத் தக்கது. அதே வேளை, ஐட்ரோகார்பன் ஆய்விற்கு வேதாந்தா நிறுவனத்திற்குக் கொடுக்கப்பட்ட அனுமதிகள் இரத்து செய்யப்பட்டனவா என்ற விளக்கம் அரசு அறிவிப்பில் இல்லை, அந்த அனுமதிகளையும் நீக்க வேண்டும் என்று காவிரி உரிமை மீட்புக்குழு தமிழ்நாடு முதல்வர் அவர்களைக் கேட்டுக்கொள்கிறது.

தமிழ்நாடு அரசின் மாசு காட்டுப்பாட்டு வாரிய அனுமதியின்றி ஓ.என்.ஜி.சி நிறுவனம் செயல்படுத்திகொண்டிருக்கும் எண்ணெய், எரிவளிக் கிணறுகள் அனைத்தையும் தடைசெய்யுமாறு தமிழ்நாடு முதலமைச்சர் அவர்களைக் கேட்டுக்கொள்கிறோம்.

பாதுகாக்கப்பட்ட காவிரி வேளாண் மண்டலத்தில் இணைக்கப்படாமல் உள்ள கரூர் மாவட்டம் குளித்தலை, திருச்சி மாவட்டம் முசிறி, மண்ணச்சநல்லூர், இலால்குடி, புள்ளம்பாடி ஒன்றியங்கள், கடலூர் மாவட்டம் சிதம்பரம் வட்டம் ஆகிய பகுதிகளையும் இணைக்குமாறு தமிழ்நாடு அரசை காவிரி உரிமை மீட்புக்குழு கேட்டுக்கொள்கிறது.

காவிரிப் படுகையைப் பாதுகாக்கப்பட்ட வேளாண்மண்டலமாக அறிவித்திட வலியுறுத்தி சனநாயகப் போராட்டங்கள் நடத்தியவர்கள் மீது போடப்பட்ட அனைத்து வழக்குகளையும் கைவிடுமாறு தமிழ்நாடு அரசைக் கேட்டுக்கொள்கிறோம்.

தீர்மானம் – 2

தனியார் வேளாண் நிலங்களில்
மணல் குவாரி அமைக்க அனுமதிக்கக் கூடாது

காவிரி டெல்டா பகுதிகளில், ஆறுகளின் கரையோரங்களில் தனியார் வயல்களில் மணல் குவாரி அமைத்து மணல் விற்பனை செய்ய அரசு அனுமதி வழங்க இருப்பதாக அறிகிறோம். அவ்வாறு ஆற்றோர வயல்களில் மணல் குவாரி தோண்டினால், அந்தப் பகுதியின் நிலத்தடி நீர் வற்றுவதுடன் அருகில் உள்ள வேளாண் நிலங்களும் பாதிக்கப்படும். ஆற்றுக்கரைகள் பலவீனம் அடைந்து, நீர்ப் பெருக்கின் போது உடையக் கூடிய அபாயம் உண்டு.

எனவே ஆற்றுக்கரையோரங்களில் தனியார் வயல்களில் மணல் குவாரி அமைக்க அனுமதிக்கக் கூடாது என்று தமிழ்நாடு அரசை காவிரி உரிமை மீட்புக்குழு கேட்டுக்கொள்கிறது.

தீர்மானம் – 3

பராமரிப்புப் பணிகளை உடனடியாகத் தொடங்குக!

காவிரி டெல்டா பகுதிகளில் ஆறுகள், கால்வாய்களில் தேவைப்படும் இடங்களில் தடுப்பணைகள் கட்டும் பணிகளை இப்போதே தொடங்க வேண்டும். ஆறுகள் வாய்க்கால்கள் ஆகியவற்றில் தூர்வாரும் பணிகள் இப்போதே தொடங்கப்பட வேண்டும்.

கடந்த காலங்களில் இப்பணிகளை ஒப்பந்தகாரர்கள் மேட்டூர் அணை திறப்பதற்கு சில நாட்களுக்கு முன்பு தொடங்கி, தண்ணீர் ஓடி வரும் நிலையில் அரைகுறையாக முடிப்பது வழக்கம். அந்த அவலம் இந்த ஆண்டு தொடராமல் இருக்க தமிழ்நாடு முதலமைச்சர் அவர்கள் தனிக் கவனம் செலுத்தி பராமரிப்பு பணிகளை உடனடியாகத் தொடங்க ஏற்பாடு செய்யுமாறு கேட்டுக்கொள்கிறோம்.

இவ்வாறு தீர்மானங்கள் நிறைவேற்றப்பட்டுள்ளன.