பஞ்சாப் மாநில சட்டப்பேரவைக்கு அடுத்த ஆண்டு பிப்ரவரியில் தேர்தல் நடைபெறும் என எதிர்பார்க்கப்படுகிறது. எனவே,அங்கு தேர்தல் நடவடிக்கைகள் சூடுபிடிக்கத் தொடங்கி உள்ளன.
சங்ரூர் நகரில் நடைபெற்ற தேர்தல் பரப்புரைப் பொதுக்கூட்டத்தில் காங்கிரசு தலைவர் கார்கே,மக்களவை எதிர்க்கட்சித் தலைவர் இராகுல் காந்தி உள்ளிட்டோர் கலந்து கொண்டனர்.
அப்போது பேசிய இராகுல் காந்தி….
பஞ்சாபில் போதைப்பொருள் பழக்கம் மிகப்பெரிய பிரச்சினையாக உள்ளது.இங்கு ஆம்ஆத்மி கட்சி ஆட்சி அமைத்தது.பஞ்சாப் மக்கள் அவர்கள் மீது நம்பிக்கை வைத்தனர்.
பஞ்சாபில் இருந்து போதைப்பொருள் பழக்கத்தை முற்றிலுமாக ஒழிப்போம் என்று ஆம்ஆத்மி அரசு வாக்குறுதி அளித்திருந்தது.பஞ்சாபின் எந்தப் பகுதியில் இவர்கள் போதைப்பொருள் பழக்கத்தை ஒழித்துள்ளார்கள்? உண்மை என்னவென்றால்,இவர்களால் போதைப்பொருள் பிரச்சினையை ஒழிக்கமுடியாது.
பகவந்த்மான் நாடாளுமன்ற உறுப்பினராக இருந்தபோது அவர் எங்களுடன் அமர்ந்து நகைச்சுவையாகப் பேசுவார். ஆனால்,காலை 11 மணிக்கே அவர் வாயில் இருந்து மதுவாடை வீசும்.பகவந்த்மான் மது அருந்துவது அவருடைய தனிப்பட்ட விசயம்.ஆனால்,பஞ்சாப் மாநிலம் போதைப்பொருள் பழக்கத்துக்கு எதிராகப் போராட வேண்டுமானால், மாநிலத்தின் முதல்வரே ஒவ்வொரு நாளும் மது அருந்திக்கொண்டிருக்கக் கூடாது.
இளைஞர்களை போதைப்பொருள் புழக்கத்துக்கு தள்ளும் ஆம்ஆத்மி அரசாங்கத்தை மன்னிக்க முடியாது.மாநில மக்கள் நிச்சயமாக அவர்களை அதிகாரத்தில் இருந்து வெளியேற்றுவார்கள்.விவசாயிகளே பஞ்சாபின் முதுகெலும்பு. பஞ்சாபில் விவசாயமும் தொழில்துறையும் வலுப்படுத்தப்படாத வரை,குண்டர்கள் மற்றும் போதைப்பொருள் கலாச்சாரத்துக்கு எதிராகப் போராடுவது சாத்தியமில்லை.
நரேந்திரமோடி ஒரு தேசத்துரோகி என்பதை என்னால் ஐந்து நிமிடங்களில் நிரூபிக்க முடியும்.நரேந்திர மோடி டொனால்டு ட்ரம்ப்பின் கட்டுப்பாட்டில் இருக்கிறார்.ட்ரம்ப் மிரட்டிய 5 நிமிடங்களில், அமெரிக்கா உடனான ஒப்பந்தத்தில் நரேந்திரமோடி கையெழுத்திட்டார்.இதுகுறித்து அமைச்சரவைக்கோ அல்லது அதிகாரிகளுக்கோ தெரிவிக்கப்பவில்லை.இந்தியாவின் விவசாயிகள் மற்றும் சிறு,குறு,நடுத்தர தொழில் நிறுவனங்களின் தரவுகளை மோடி ட்ரம்ப்பிடம் ஒப்படைத்தார்.
தனது நண்பர் அதானியைக் காப்பாற்றவே மோடி இதையெல்லாம் செய்தார்.ஏனெனில்,அமெரிக்கா உடனான அந்த ஒப்பந்தம் கையெழுத்தான பிறகு,அமெரிக்காவில் அதானிக்கு எதிராக இருந்த வழக்கு கைவிடப்பட்டது.தற்போது பஞ்சாப் அரசாங்கம் டெல்லியில் இருந்து இயக்கப்படுகிறது.அதிகாரத்தின் ஒருபாதியை அமித்ஷாவும்,மறுபாதியை கெஜ்ரிவாலும் தங்கள் வசம் வைத்துள்ளனர்.பஞ்சாப் மக்களுக்கு இங்கிருந்து உழைக்கும் ஒரு அரசாங்கம் தேவை. காங்கிரஸ் ஆட்சியில் இருந்தபோது பஞ்சாப் அரசாங்கம்,பஞ்சாபில் இருந்தே இயக்கப்பட்டது
இவ்வாறு அவர் பேசினார்.
