இதனால்தான் பதவி இழந்தேன் – வங்கதேச முன்னாள் பிரதமர் திடுக்கிடும் குற்றச்சாட்டு

வங்கதேசத்தில் இடஒதுக்கீடு நடைமுறையை எதிர்த்து ஜூன், ஜூலை மாதங்களில் மாணவர் சங்கங்கள் பெரும் போராட்டம் நடத்தின.

இது கலவரமாக மாறியதால்,ஆகஸ்ட் 5 ஆம் தேதி பிரதமர் பதவியை ராஜினாமா செய்த ஷேக் ஹசீனா, இந்தியாவில் தஞ்சமடைந்துள்ளார்.

இந்நிலையில், இதுதொடர்பாக அவர் அளித்த நேர்காணலில் கூறியதாவது…

வங்கதேசத்துக்குச் சொந்தமான செயின்ட் மார்ட்டின் தீவை தங்களிடம் ஒப்படைக்க அமெரிக்கா வலியுறுத்தியது. அந்தத் தீவை அமெரிக்காவுக்கு வழங்கியிருந்தால், ஆட்சியில் நீடித்திருப்பேன்.ஆனால், வங்கதேசத்தின் நலனுக்கு மட்டுமே முன்னுரிமை அளித்தேன்.தற்போது அமெரிக்காவின் சதியால் ஆட்சியை இழந்துள்ளேன்.

நான் பேசியதைத் திரித்துக் கூறி மாணவர் போராட்டத்தை சிலர் தூண்டினர்.போராட்டங்களில் ஈடுபட்ட மாணவர்கள் பரிதாபமாக உயிரிழப்பதை நான் விரும்பவில்லை.எனவே, மாணவர்களின் நலன் கருதி,பதவியை ராஜினாமா செய்தேன்.

வங்கதேச மக்களுக்கு ஒரு வேண்டுகோள்.சமூக விரோதிகளை நம்பி ஏமாறாதீர்கள்.அவர்களை எதிர்த்து நில்லுங்கள்.அவாமி லீக் கட்சியினர் மற்றும் பொதுமக்கள் தாக்கப்படுவதாக வரும் செய்திகள் கவலை அளிக்கின்றன.

நாட்டின் விடுதலைக்காக என் தந்தையும் (முஜிபுர் ரகுமான்), குடும்பத்தினரும் தங்கள் இன்னுயிரைத் தியாகம் செய்தனர்.வங்கதேசம் மற்றும் நாட்டு மக்களுக்காக தொடர்ந்து பிரார்த்தனை செய்வேன். இறைவன் அருளால் மீண்டும் வங்கதேசத்துக்கு திரும்பி வருவேன்.

இவ்வாறு அவர் தெரிவித்துள்ளார்.

வங்கதேசத்துக்குச் சொந்தமான ஒரு தீவை அமெரிக்கா கேட்டது.அதைக் கொடுக்க மறுத்தேன்.அதனால் அமெரிக்கா எனக்கெதிராகச் சதி செய்தது.அதன் விளைவாக நான் பதவி இழந்தேன் என்று முன்னாள் பிரதமர் ஷேக்ஹசினா வெளிப்படையாகக் குற்றம் சாட்டியிருப்பது உலக அரசியலில் பரபரப்பான பேசு பொருளாக மாறியுள்ளது.