குஜராத்தை வீழ்த்தி சாதித்த தமிழ்நாடு- ஜவுளி ஏற்றுமதியில் இந்தியாவில் முதலிடம்

2024-25 ஆம் நிதியாண்டிற்கான இந்தியாவின் ஜவுளி ஏற்றுமதியில் அனைத்து மாநிலங்களையும் பின்னுக்குத் தள்ளி, தேசிய அளவில் தமிழ்நாடு முதலிடத்தைப் பிடித்து வரலாற்று சாதனை படைத்துள்ளது.

நிர்யாத் (NIRYAT) எனப்படும் ஏற்றுமதியாளர் தரவுகளின் அடிப்படையில் வெளியாகியுள்ள புள்ளிவிவரங்களின்படி, 2024-25 ஆம் ஆண்டில் தமிழ்நாட்டின் மொத்த ஜவுளி ஏற்றுமதி மதிப்பு 7,997.17 மில்லியன் டாலர்களாக பதிவாகி, இந்தியாவிலேயே வேறு எந்த மாநிலமும் நெருங்க முடியாத உச்சத்தைத் தொட்டுள்ளது.

கடந்த ஆட்சிக் காலமான 2020-21 ஆம் ஆண்டில் 6,193.39 மில்லியன் டாலர்களாக மட்டுமே இருந்த தமிழ்நாட்டின் ஜவுளி ஏற்றுமதி,கடந்த 4 ஆண்டுகளில் அபரிமிதமான எழுச்சியைக் கண்டுள்ளது.தமிழ்நாடு அரசின் சார்பாக திருப்பூர், கோவை, ஈரோடு உள்ளிட்ட ஜவுளி மையங்களுக்கு அளிக்கப்பட்ட சிறப்புச் சலுகைகள் மற்றும் தொழிலாளர் நலன் சார்ந்த நடவடிக்கைகளால், ஏற்றுமதி முந்தைய ஆண்டுகளை விட 29 விழுக்காடு என்ற பிரமாண்ட வளர்ச்சியைப் பதிவு செய்து 7,997.17 மில்லியன் டாலர்களை எட்டியுள்ளது.

தொழில் வளர்ச்சியில் தங்களை முன்னணி மாநிலங்களாகக் காட்டிக் கொள்ளும் குஜராத் மற்றும் மகாராஷ்டிராவை, தமிழ்நாடு பின்னுக்குத் தள்ளியுள்ளது.

இப்பட்டியலில், தமிழ்நாடு – 7,997.17 மில்லியன் டாலர்கள் (முதலிடம்), குஜராத் – 5,646.01 மில்லியன் டாலர்கள் (இரண்டாம் இடம்), மகாராஷ்டிரா – 3,831.28 மில்லியன் டாலர்கள் (மூன்றாம் இடம்), உத்தரபிரதேசம் – 3,679.5 மில்லியன் டாலர்கள் (நான்காம் இடம்) என உள்ளன. குஜராத்தை விட தமிழ்நாடு சுமார் 2,351 மில்லியன் டாலர்கள் அளவுக்கு கூடுதலாக ஏற்றுமதி செய்து, இந்தியாவின் ஜவுளி தலைநகரம் தமிழ்நாடுதான் என்பதை ஆணித்தரமாக நிரூபித்துள்ளது.

பிற மாநிலங்களின் நிலையைப் பொறுத்தவரை மத்திய பிரதேசம் (1,324.97), மேற்கு வங்கம் (921.95), இராஜஸ்தான் (855.37) போன்ற மாநிலங்கள் பலமடங்கு பின்தங்கியுள்ளன. தென்னிந்தியாவில் ஆந்திரா (506.42), கேரளா (434.14), தெலங்கானா (111.09) ஆகிய மாநிலங்களை விட தமிழ்நாடு மிகப்பெரிய ஜாம்பவானாகத் திகழ்கிறது.

எளிதான தொழில் தொடங்கும் சூழல், உலக முதலீட்டாளர்கள் மாநாடு மூலம் ஈர்க்கப்பட்ட பல்லாயிரம் கோடி முதலீடுகள், புதிய மினி ஜவுளி பூங்காக்கள் அமைக்கும் திட்டம் போன்ற முதலமைச்சர் மு.க.ஸ்டாலினின் சீரிய முன்னெடுப்புகளே இந்த மாபெரும் வெற்றிக்குக் காரணமாக அமைந்துள்ளன.

கப்பல் மற்றும் விமானப் போக்குவரத்து மூலம் சர்வதேச அளவில் கொடிகட்டிப் பறக்கும் தமிழ்நாடு, ஜவுளி ஏற்றுமதியிலும் சாதனை படைத்திருக்கிறது.

இது, பொருளாதார வளர்ச்சியில், தமிழ்நாடு அசுரவேகத்தில் முன்னேறி வருவதற்கான மிகச்சிறந்த சான்றாக அமைந்துள்ளது எனப் பொருளாதார வல்லுநர்களும், தொழில்துறையினரும் முதலமைச்சர் மு.க.ஸ்டாலினைப் பாராட்டி வருகின்றனர்.