தமிழீழ விடுதலைக்கான வியூகங்களை மாற்ற வேண்டும் – சீமான் அறிக்கை

2025 ஆம் ஆண்டு மாவீரர் நாளையொட்டி நாம் தமிழர் சீமான் வெளியிட்டுள்ள அறிக்கை….

உலகம் முழுவதும் பரவி வாழ்கிற தாய்த்தமிழ் உறவுகளுக்கு வணக்கம்.

இன்று மாவீரர் நாள்..!

மங்காப் புகழ் கொண்ட தமிழர் என்ற தேசிய இனத்தின் தாயக விடுதலைக்காக தன் உயிரை விதையாக தாய் மண்ணில் விதைத்த மாவீரர் தெய்வங்களின் ஈகத்திருநாள்.

தமிழர்களின் மற்றொரு தாய் நிலமான தமிழீழத் தாயகம் விடுதலைபெற, ஆர்ப்பரித்து எழுந்த ஆயிரமாயிரம் மாவீரர்களை நினைவில் நிறுத்தி போற்றுகின்ற புனித நாள்.

தாயக விடுதலை என்கின்ற உச்ச இலக்கிற்காக குருதி சிந்தி, உயிரை விலையாக கொடுத்து வீரத்தின் இலக்கணமாக மாறிப்போன மாவீரர்கள் நம் நெஞ்சம் முழுக்க நிறைகின்ற உணர்ச்சி நாள்.

அடிமைக் காரிருளை நீக்க, தங்களையே எரித்து விடுதலை வெளிச்சம் தந்த, நம் குலசாமிகளான மாவீரர்களை, காந்தள் மலரும் இந்த கார்த்திகை மாதத்தில் நம் ஆன்மாவில் நிறுத்தி இனத்தின் விடுதலை என்கின்ற இலக்கிற்கு வழிகாட்டுகிற ஒளிவிளக்குகளாக நினைத்து போற்றி வணங்குகிற பொன்னாள்.

இந்த நாள் விடுதலை என்கின்ற மகத்தான கனவிற்காக இன்னுயிரை ஈந்தவர்களை நினைத்து அழுது, புலம்பும் நாள் அல்ல; மாறாக எந்த புனித கனவிற்காக, எந்த தமிழீழ நாட்டை அமைப்பதற்காக, நம் மாவீரர்கள் தங்கள் உயிரை ஈந்தார்களோ, அந்த புனிதக் கனவை நம் நெஞ்சத்தில் நிறைத்து வீழ்வதெல்லாம் எழுவதற்கே என நமக்கு நாமே உறுதி ஏற்றுக் கொண்டு மண்ணின் விடுதலைக்காக களமாடிட பற்றுறுதி கொள்கின்ற வரலாற்று நாள்.

நிலமற்ற இனமும், நிர்வாண உடலும் அவமானகரமானது என்றார் நம் தேசியத் தலைவர் மேதகு வே பிரபாகரன். ஒரு தேசிய இனம் தனக்கான எல்லாவித உரிமைகளுடன் கூடிய ஒரு இறையாண்மை தாயகத்தை என்று அடைகிறதோ, அன்றுதான் அதனை விடுதலை பெற்ற இனமாக கருதமுடியும் என அரசியல் அறிவியல் கூறுகிறது . அத்தகைய வரலாற்று புகழ்வாய்ந்த ஒரு தேசிய இனத்திற்காக, மண் விடுதலை எனும் இலட்சிய இலக்கினை அடைய, தலைவர் வழி நின்று தன்னிகரற்ற போர் புரிந்து வரலாறு படைத்தவர்கள் நம் மாவீரர்கள். தமிழ்த்தேசிய தலைவர் மேதகு வே.பிரபாகரன் அவர்கள் கனவு கண்ட தமிழீழ சோசலிசக் குடியரசு நாட்டினை உருவாக்கிட விதையாய் விழுந்த மாவீரர்கள் இதுவரை உலகம் கண்டிராத வீரத்திற்கும், அறத்திற்கும் சான்றாய் ஆனவர்கள்.

தமிழீழ நாடு என்பது வெறும் நிலப்பரப்பு அல்ல.அது ஒரு கனவு தேசம்.சாதி எதிர்ப்புக்கு என்று இயக்கம் கட்டியவர்கள் இருந்த தாயகத் தமிழகத்தில் கூட சாதிக்க முடியாத சாதியற்ற சமூகத்தை உருவாக்கி, சாதி ஏற்றத் தாழ்வுகள் இல்லாத,அனைத்தும் தமிழ்மொழியில் அமைந்து, தற்சார்பு பொருளாதார வாழ்வோடு இணைந்து , பெண் விடுதலை, பாதுகாப்பான வாழ்வு என தலைவர் காட்டிய வழியில் தழைத்த சுதந்திரப் பயிர். அதைக் கருக விடாமல், தன்னைக் கருக்கிக் காத்தவர்கள் நம் மாவீரர்கள்.

தமிழ்ப் பேரினம் மட்டுமல்ல, உலக மானுட இனத்தில் இப்படிப்பட்டவர்கள் எப்படித் தோன்றினார்கள் என்று உலகம் வியக்கும் அளவிற்கு பெரும் வீரர்களை தமிழ்மக்கள் இராணுவமான விடுதலைப்புலிகள் அமைப்பு பெற்றிருந்தது. அத்தகைய வீரமும், அறிவும் ஒருங்கே இணைந்த ஆற்றல்மிகு மறவர் கூட்டம் கொண்ட மனித ஆற்றலை, அறிவுத்திறனை இந்த இனம் இழந்துதான் நிகழ்ந்ததிலேயே ஆகப்பெரும் இழப்பு என்கிற வலி எப்போதும் எனக்குள் இருக்கிறது.

ஆயுதங்களைக் கைவிடுங்கள், நாங்கள் சமாதானம் தருகிறோம் என்று உலகத்தார் தந்த உறுதிமொழிகளை போர் முடிந்து 16 ஆண்டுகளுக்கு மேலாகியும் தமிழர்களின் துயரங்களுக்கு ஒரு அரசியல் தீர்வை உலக சமூகம் வழங்கவில்லை என்பது தமிழர்களுக்கு இழைக்கப்பட்ட அநீதி. 2009 இல் சிங்களப் பேரினவாத அரசால் நிகழ்த்தப்பட்ட இனப்படுகொலைப் போரின் போது காணாமல் ஆக்கப்பட்டோர், விசாரணை என்ற பெயரில் கடத்தப்பட்டோரெலாம் என்ன ஆனார்களோ என எம்மினத் தாய்மார்கள் வடிக்கும் கண்ணீருக்கு எவரிடத்திலும் பதில் இல்லை. இதுகுறித்து ஆட்சி மாறினாலும் அதிகாரத்தில் இருக்கின்ற கட்சி மாறினாலும் சிங்கள ஆட்சியாளர்கள்
எவ்வித பதிலையும் அளிப்பதில்லை.

சமீபத்தில் கூட புதிதாகக் கண்டறியப்பட்ட, இன்னும் புதிது புதிதாகக் கண்டறியப்பட்டுக் கொண்டே இருக்கின்ற,செம்மணி உள்ளிட்ட தமிழர்களை அநியாயமாகக் கொன்று புதைத்த மனித புதைகுழிகள் தமிழ் இனப்படுகொலைக்கு மிகப்பெரிய ஆதாரமாக வலுசேர்க்கின்றன. ஈழத்தில் நடைபெற்றது இனப்படுகொலை என்பதை ஏற்க மறுத்த உலகநாடுகளும் ஐ.நா.மன்றமும் இதற்கு என்ன பதில் கூறப்போகிறார்கள்?

ஒவ்வொரு ஐநா மன்ற அமர்வின் போதும் இனப்படுகொலை விசாரணை குறித்து தமிழர்கள் எழுப்பும் எந்த ஒரு குரலுக்கும் உலகசமூகம் மௌனத்தையே பதிலாகத் தருவது தமிழ்த்தேசிய இனத்திற்கு மிகப்பெரிய துரோகமாகும். இன்றளவும் தொடர்ச்சியாக தமிழர்பகுதிகளில் புதிய சிங்களக் குடியேற்றங்களைத் திணித்து,தமிழர் தேசத்தை சிங்களமயமாக்கி தமிழர்களை ஈழ தாயகத்தில் முற்று முழுதாக ஒழிக்க முயல்கின்றார்கள்.

இலங்கை தன்னை ஒரு ஜனநாயகநாடு என சொல்லிக் கொண்டாலும், தமிழர்களின் தாய்நிலமான, எம் தமிழீழ மண்ணில் போர் முடிந்து இத்தனை ஆண்டுகள் கழிந்தும் கூட சிங்களப் படையணிகள் முற்றிலுமாக அகற்றப்படவில்லை. சனநாயகத்தின் வாயிலாக தேர்தல் மூலம் பொறுப்பிற்கு வந்த ஈழமண்ணின் தமிழினத் தலைவர்கள் எந்த அதிகாரமும் இல்லாமல் முடக்கி வைக்கப்பட்டு இருப்பது சிங்கள இனவாத அரசு ஒருபோதும் மக்கள் சனநாயகத்தை மதிக்காது என்கிற நிலையை தெளிவாகக் காட்டுகிறது.

தன் சொந்த நிலத்திலேயே எம் மக்கள் இரண்டாம் தரக் குடிமக்களாக அடிப்படை வசதிகள் ஏதுமற்று, ஒரு காலத்தில் எம் தேசியத் தலைவரின் புனிதமான ஆட்சியின் கீழ், தமிழீழ தேசத்தில் வாழ்ந்த அந்தக் கனவு வாழ்க்கையை நினைத்து ஏங்கித் தவித்து வருகிறார்கள். இன்று சிங்கள தேசம் கடுமையான பொருளாதாரச் சிக்கலில் சிக்கிக் கொண்டதற்கு முதன்மையான காரணம் எம் தமிழினத்தின் மீது அவர்கள் அநீதியாக நடத்திய போர்தான் என்பதை சிங்களர்களே ஒத்துக் கொள்ளும் நிலைமை ஏற்பட்டு இருக்கிறது.

ஈழத்தில் அரசியல் சூழல்கள் முழுதாக மாறி இருக்கின்ற இந்தக் காலகட்டத்தில் தமிழர்களும் தமிழீழ விடுதலைக்கான தங்களது வியூகங்ளை மாற்றி அமைக்க வேண்டிய கடமை இருக்கிறது. மாறி வருகிற உலக ஒழுங்குக்கு ஏற்ப நாமும் நமது தாயக விடுதலைக்கான வியூகங்களை மாற்றி அமைக்கவேண்டும். புதிதாக அமைந்திருக்கின்ற வல்லாதிக்க அரசுகளின் ஆட்சி மாற்றங்களை உன்னிப்பாகக் கவனித்து அதற்கு ஏற்றாற்போல் தமிழீழ நாட்டின் விடுதலைக்கான வழியைச் செப்பனிட வேண்டும்.இனியும் உதிரிகள் போல சிதறி, தனித்தனி குழுக்களாக, தனித்தனி அமைப்புகளாக, தனித்தனி நபர்களாக தான்மை உணர்வே மேன்மை என கருதி, பிரிந்து பிளந்து நின்றால் இன விடுதலையை அடையமுடியாது என்பதை இப்போதாவது உலகத்தமிழர்கள் உணர்ந்துகொள்ள வேண்டும்.

ஒற்றுமை ஒன்றே நமது வலிமை அதுவே நமது மாவீரர்கள் கண்ட கனவை நிறைவேற்ற நமக்கு வைத்திருக்கின்ற ஒரேவழி என்பதை உணர்ந்து தாயக விடுதலை புனித இலட்சியத்திற்காக நாம் அனைவரும் கைகோர்த்து மாவீரர்கள் நமக்கு அளித்த ஆன்மபலத்தோடு இனி நாம் பயணிக்கவேண்டும். ஒவ்வொரு மாவீரர் தினத்தின் போதும் நமக்குள் இருக்கின்ற விடுதலைக்கு எதிரான அத்தனை எதிர்மறை எண்ணங்களையும் சாகடித்து விடுதலை என்ற ஒற்றை நோக்கத்தில் நாம் அனைவரும் அணி திரளவேண்டும்.

எம் ஈழ உறவுகளின் துயர் நீங்க சிங்கள அரசிற்குக் கடுமையான அழுத்தங்கள் தரவேண்டிய கடமை எட்டு கோடிக்கும் மேலான தமிழர்கள் வாக்குச் செலுத்தி வரி செலுத்தி வருகிற இந்திய அரசிற்கு உண்டு.

தமிழர்களுக்கு எதிரான வெளியுறவுக் கொள்கை மாற வேண்டுமானால் இந்தியாவின் அரசியல் நிலைகள் மாற வேண்டும் அதற்கு முதன்மையாக தாயகத் தமிழகத்தில் தாய்மண்ணையும், தமிழ்மொழியையும் உயிராக நேசிக்கிற தமிழ்த் தேசிய அரசியல் மேன்மையுற வேண்டும் என்கின்ற எண்ணம் உலகம் முழுதும் வாழ்கின்ற தமிழர்களின் உள்ளத்தில் மலரத் தொடங்கி இருப்பதை நான் நம்பிக்கையாகப் பார்க்கிறேன். தாயக தமிழகத்தில் தமிழ்த் தேசிய அரசியல் மாபெரும் ஜனநாயக போர்க்களமான தேர்தல் களத்தில் வென்றால் ஒழிய, தமிழ்த் தேசிய இனத்திற்கென்று விடிவு இல்லை என்பதைப் புரிந்து கொண்டு இந்த புனிதமான மாவீரர் நாளில் தாய்த்தமிழ் உறவுகள் நாம் அனைவரும் வருகிற 2026 தேர்தல் களத்தில் புலிக்கொடி உயர்ந்து விவசாயி வெல்ல உறுதி ஏற்க வேண்டும்.

தொடர்ச்சியாக உலக அரங்கில் அசராது, தமிழீழ விடுதலை சார்ந்து நாம் தருகிற அழுத்தங்கள் மூலம் ஒரு பொது வாக்கெடுப்பிற்கு சிங்கள அரசை உட்படுத்த வேண்டும். இதற்கு ஏற்றாற் போல் ஒருங்கிணைந்த ஒற்றுமையோடு நமது நகர்வுகள் நிகழவேண்டும் என்பதுதான் இந்த மாவீரர் நாளில் நாம் ஏற்க வேண்டிய உறுதியாகும். அந்த உறுதியோடுதான் தாயக தமிழகத்தில் “நாம் தமிழர்” என்ற மகத்தான படையைக் கட்டி, எந்த அதிகாரத்தால் நாம் வீழ்ந்தோமோ அந்த அதிகாரத்தைக் கைப்பற்ற பெரும் பாய்ச்சலோடு பயணித்து வருகிறோம்.

போர் முடிந்து 16 ஆண்டுகளுக்கு மேல் ஆகிவிட்டது இனி அதைப்பற்றிப் பேச என்ன இருக்கிறது என்று சொன்னவர்கள் கூட மாவீரர்கள் கண்ட கனவை என்ன விலை கொடுத்தேனும் நிறைவேற்றிட தாயகத் தமிழகத்தில் இலட்சக்கணக்கான தமிழர்கள் திரண்டு வருவதை வியப்பாகப் பார்க்கிறார்கள்.

ஆகவே, தமிழீழ நாட்டின் விடுதலையை நம் தலைமுறையிலேயே அடைவதற்கு, அரசியலாக நாம் வலிமை பெறுவதே ஒரே வழி. அதை நோக்கித்தான் மாவீரர் தெய்வங்கள் நம்மை வழி நடத்திக் கொண்டிருக்கிறார்கள்.
மரணம் கண்ணுக்கு முன்னால் நிற்கின்ற அந்தக் காலநொடியில், மங்காப்புகழ் கொண்ட மாவீரர்களின் இமைக்காத விழிகளில் உறைந்திருந்த தாயக விடுதலை என்கின்ற கனவு நம்மை ஒவ்வொரு நொடியும் இயக்கும்.
மண்ணின் விடுதலைக்கு உயிரே விலையானாலும் அந்த உயிரையும் தருவதற்குத் துணிந்த மாவீரர்களின் மூச்சுக்காற்று ஒவ்வொரு நொடியும் எம் சிந்தையிலும்,எம் செயலிலும் எம்மை வழி நடத்தும்.
தாய்மண் விடுதலைக்காக மாவீரர் சிந்திய குருதி என்றென்றும் எம் நினைவுகளில் உலராமல் உள்ளார்ந்த ஆன்ம ஆற்றலாய் ஒளிரும்.

உலகம் இருக்கும் வரை எமது மாவீரர்களின் புகழ் இருக்கும்.‌அந்தப் புகழ்ஒளியில் எம் தலைவர் பிரபாகரன் கண்ட தமிழீழம் பிறக்கும்.

தாயகக் கனவில் சாவினைத் தழுவிய சந்தனப் பேழைகளான எம் மாவீரர் தெய்வங்களுக்கு எமது வீர வணக்கம்! வீர வணக்கம்!

மாவீரர் சிந்திய குருதி வெல்வது உறுதி!
தமிழர்களின் தாகம் தமிழீழத் தாயகம்!

இவ்வாறு அவர் கூறியிருக்கிறார்.