காரல் மார்க்ஸ் குறித்து அவதூறாகப் பேசிய ஆளுநர் ஆர்.என்.ரவிக்கு பொதுவுடைமைக் கட்சித் தலைவர்கள் கண்டனம் தெரிவித்துள்ளனர்.
இதுதொடர்பாக இந்திய கம்யூனிஸ்ட் கட்சியின் தமிழ்நாடு செயலாளர் மு.வீரபாண்டியன் வெளியிட்ட அறிக்கையில்…
ஆளுநர் மாளிகையில் நடைபெற்ற நிகழ்ச்சி ஒன்றில் பேசிய ஆளுநர் ஆர்.என்.ரவி, காரல் மார்க்ஸை பின்பற்றியவர்கள் இந்திய நாகரிகம், கலாச்சாரத்தை அழித்துவிட்டதாக அநாகரிகமாகப் பேசியுள்ளார்.
இந்தியாவின் பன்முகத்தன்மையையும், பல மொழிகள் பேசும் மக்களின் கலாச்சாரத்தையும் அழித்தொழிக்க முயலும் ஆர்எஸ்எஸ் இயக்கத்தின் சித்தாந்தத்தைப் பின்பற்றும் ஆர்.என்.ரவி இத்தகைய குற்றச்சாட்டை கார்ல் மார்க்ஸ் மீது வைத்துள்ளது கடும் கண்டனத்துக்குரியது.
இந்திய விடுதலைப் போராட்டத்தில் சிறிதளவும் பங்கெடுக்காத ஆர்எஸ்எஸ் இயக்கத்தின் வாரிசான ஆர்.என்.ரவி, இந்திய விடுதலையை ஆதரித்த மார்க்ஸை விமர்சிக்கத் தகுதியற்றவர். சனாதன தர்மத்தை உயர்த்திப்பிடிக்கும் ஆளுநர் ரவிக்கு சமத்துவம் என்பதும், பொதுவுடைமை என்பதும் எட்டிக்காயாகவே கசக்கும்.எத்தனை ஆர்.என்.ரவிகள் வந்தாலும், சனாதன கலாச்சாரம் வீழ்வதையும், முற்போக்கு கலாச்சார மாற்றங்கள் நிகழ்வதையும் தடுக்க முடியாது
இவ்வாறு அவர் கூறியுள்ளார்.
மார்க்சிஸ்ட் கம்யூனிஸ்ட் கட்சியின் தமிழ்நாடு செயலாளர் பெ.சண்முகம் வெளியிட்ட அறிக்கையில்….
கார்ல்மார்க்ஸ் மட்டுமல்ல, எந்தவொரு மாமனிதரையும் யாரும் விமர்சிக்கலாம் என்பதே மார்க்சியர்களின் நிலைபாடு. ஆனால், அதற்கு விமர்சிக்கப்படுபவர்கள் குறித்து முழுமையாக உள்வாங்கிக் கொண்டு உண்மைகளின் அடிப்படையில் விமர்சிக்க வேண்டும்.
சில பெயர்களை மட்டும் தெரிந்து கொண்டு அவற்றின் மீது தான் கரை கண்டவர் போல, வரலாற்று அறிஞர்கள் திடுக்கிடும் வகையில் அவதூறுகளை அள்ளிவீசுவதில் ஆளுநர் ஆர்.என்.ரவிக்கு டாக்டர் பட்டமே வழங்கலாம். ஆர்எஸ்எஸ் கூட்டத்தின் பிரதிநிதியான ஆர்.என்.ரவி காலனியாதிக்கத்தைக் கடுமையாக எதிர்த்த காரல் மார்க்ஸை அவதூறு செய்வது கடும் கண்டனத்திற்குரியது
இவ்வாறு அவர் கூறியுள்ளார்.