நீட் தேர்வை தேசிய அளவில் முற்றிலுமாக அகற்ற வேண்டும், நீட்விலக்கு கோரிய தமிழ்நாடு அரசின் மசோதாவுக்கு ஒன்றிய அரசு உடனடியாக ஒப்புதல் அளிக்க வேண்டும் என்பதை வலியுறுத்தி முதலமைச்சர் மு.க.ஸ்டாலின் சட்டப்பேரவையில் ஜூன் 28 அன்று தீர்மானம் கொண்டு வந்தார்.அத்தீர்மானம் ஒருமனதாக நிறைவேறியது.
நீட் விலக்கு மசோதாவுக்கு ஒன்றிய அரசு உடனடியாக ஒப்புதல் அளிக்க வலியுறுத்தி சட்டப்பேரவையில் அரசினர் தீர்மானத்தை முன்மொழிந்து முதலமைச்சர் மு.க.ஸ்டாலின் பேசியதாவது….
2017 ஆம் ஆண்டில் மருத்துவ மாணவர் சேர்க்கைக்கு நீட்தேர்வை ஒன்றிய அரசு கட்டாயமாக்கியது. அதன்பிறகு, ஏழை மாணவர்களுக்கு மருத்துவப் படிப்பு எட்டாக்கனி ஆகிவிட்டது. எனவேதான், நீட் தேர்வு அறிமுகம் செய்ததில் இருந்தே, அரசியல் ரீதியாகவும், சட்ட ரீதியாகவும் தொடர்ந்து எதிர்த்து வருகிறோம்.
முன்னாள் நீதிபதி ஏ.கே.ராஜன் தலைமையில் அமைக்கப்பட்ட உயர்நிலைக் குழுவின் பரிந்துரைப்படி, 2021 செப்டம்பர் 13 ஆம் தேதி சட்டப்பேரவையில் ‘தமிழ்நாடு மருத்துவ பட்டப் படிப்புகளுக்கான சேர்க்கை சட்டம்’ என்ற மசோதா ஒருமனதாக நிறைவேற்றப்பட்டது. ஆனால், நீண்டநாட்களாக ஆளுநரால் ஒப்புதல் தரப்படாமல் திருப்பி அனுப்பப்பட்டது.
இந்நிலையில், 2022 பிப்ரவரி 5 ஆம் தேதி அனைத்துக் கட்சி கூட்டம் நடத்தப்பட்டு, அந்தச் சட்ட மசோதாவை மீண்டும் சட்டப்பேரவையில் அறிமுகப்படுத்த தீர்மானம் நிறைவேற்றப்பட்டது. பிப்ரவரி 8 ஆம் தேதி சட்டப்பேரவையில் சட்ட முன்வடிவு மீண்டும் நிறைவேற்றப்பட்டது. குடியரசுத் தலைவரின் ஒப்புதலுக்காக ஒன்றிய அரசுக்கு ஆளுநரால் அனுப்பப்பட்டது. ஆனால், ஒப்புதல் அளிக்காமல் ஒன்றிய அரசு காலம் தாழ்த்தி வருகிறது.
இந்நிலையில், சமீபத்தில் நடைபெற்ற நீட் தேர்வில், அரங்கேறியுள்ள சம்பவங்கள், மாணவர்களின் நம்பிக்கையை நிலைகுலையச் செய்துள்ளன. தேர்வுக்கு முன்பே வினாத்தாள் வெளியான தகவல், தேர்வு கண்காணிப்பாளரே விடைத்தாள்களை நிரப்பிய முறைகேடு எனப் பல்வேறு குற்றச்சாட்டுகள், மாணவர்களையும், அவர்களது குடும்பங்களையும் அதிர்ச்சியில் ஆழ்த்தியுள்ளன.
ஆனால், இந்தக் குற்றச்சாட்டுகளை முற்றிலுமாக மறுத்துள்ள ஒன்றிய அரசு, உச்ச நீதிமன்றத்தில் குட்டு வாங்கிய பின்னரே, தேர்வு நடத்தும் தேசிய தேர்வு முகமை(என்டிஏ) தலைவரை மாற்றியுள்ளது. சிபிஐ விசாரணைக்கு உத்தரவிட்டுள்ளதுடன், முதுநிலை மருத்துவப் படிப்புகளுக்கான நீட் தேர்வும் இரத்து செய்யப்பட்டுள்ளது.
நீட் தேர்வுக்கு எதிரான தமிழ்நாட்டின் குரல் இன்று இந்தியாவின் குரலாக நாடு முழுவதும் எதிரொலிப்பதை அண்மை நிகழ்வுகள் காட்டுகின்றன.
மருத்துவப் படிப்புகளுக்கான மாணவர் சேர்க்கையில் மாநில அரசுகளே முடிவெடுத்த பழைய நிலையைக் கொண்டுவர வேண்டும் என பிரதமருக்கு மேற்கு வங்க முதல்வர் மம்தா பானர்ஜி கடிதம் எழுதியுள்ளார். மக்களவை எதிர்க்கட்சித் தலைவர் இராகுல் காந்தி, உத்தர பிரதேச முன்னாள் முதல்வர் அகிலேஷ் யாதவ், பிகார் எதிர்க்கட்சித் தலைவர் தேஜஸ்வி யாதவ் எனப் பலரும் நீட் தேர்வை இரத்து செய்ய வலியுறுத்தி கடிதம் எழுதியுள்ளனர். இந்தச் சூழலில், நமது முயற்சிகளை வெற்றியடையச் செய்ய இத்தீர்மானத்தை நிறைவேற்றித் தரவேண்டும்.
தீர்மான விவரம்…
கிராமப்புற, ஏழை எளிய மாணவர்களின் மருத்துவக் கல்வி வாய்ப்புகளைக் கடுமையாகப் பாதிக்கும் வகையிலும், பள்ளிக் கல்வியை அவசியமற்றதாக்கும் வகையிலும், மாநில மருத்துவக் கல்லூரிகளில் மாணவர்களைச் சேர்க்கும் உரிமையை மாநில அரசுகளிடம் இருந்து பறிக்கும் வகையிலும் அமைந்துள்ள நீட்தேர்வு அகற்றப்பட வேண்டும்.
இந்தத் தேர்வில் இருந்து தமிழ்நாட்டுக்கு விலக்கு அளித்து, பள்ளிக் கல்வியில் மாணவர்கள் பெறும் 12 ஆம் வகுப்பு மதிப்பெண் அடிப்படையில் மருத்துவ மாணவர் சேர்க்கையை மேற்கொள்வதற்காக, சட்டப்பேரவை ஒருமனதாக நிறைவேற்றி அனுப்பிய நீட் விலக்கு சட்ட மசோதாவுக்கு ஒன்றிய அரசு அரசு உடனே ஒப்புதல் அளிக்க வேண்டும்.
தேசிய அளவில் நீட் தேர்வு முறை கைவிடப்படும் வகையில் தேசிய மருத்துவ ஆணையச் சட்டத்தில் தேவைப்படும் திருத்தங்களை ஒன்றிய அரசு மேற்கொள்ள வேண்டும் என்று தமிழ்நாடு சட்டப்பேரவை ஒருமனதாக வலியுறுத்துகிறது.
இவ்வாறு முதலமைச்சர் தீர்மானத்தை முன்மொழிந்தார்.
இத்தீர்மானத்தை, செல்வப்பெருந்தகை (காங்கிரசு), தி.வேல்முருகன் (தவாக),ஈ.ஆர்.ஈஸ்வரன் (கொமதேக), ஜவாகிருல்லா (மமக), சதன் திருமலைக்குமார் (மதிமுக), இராமச்சந்திரன் (இந்திய கம்யூனிஸ்ட்), நாகைமாலி (மார்க்சிஸ்ட்), ஆளூர் ஷாநவாஸ் (விசிக), ஜி.கே.மணி (பாமக), மனோஜ் பாண்டியன் (ஓபிஎஸ் பிரிவு) ஆகியோர வரவேற்றுப் பேசினர். தீர்மானத்தை எதிர்த்து பாஜக உறுப்பினர்கள் வெளிநடப்பு செய்தனர்.
தொடர்ந்து, தீர்மானத்தை ஒருமனதாக நிறைவேற்றித் தருமாறு முதலமைச்சர் மு.க.ஸ்டாலின் கோரினார்.அதன்பிறகு, குரல் வாக்கெடுப்பு மூலம் தீர்மானம் ஒருமனதாக நிறைவேற்றப்பட்டதாக பேரவைத் தலைவர் அப்பாவு அறிவித்தார்.
