வங்கக்கடலில் நிலவும் ஆழ்ந்த காற்றழுத்தத் தாழ்வுப் பகுதி தொடர்ந்து வலுப்பெற்று புயலாக மாறக்கூடும் என்று வானிலை ஆய்வு மையம் தெரிவித்துள்ளது.இதன் காரணமாக தேனி,திண்டுக்கல்,மதுரை ஆகிய மாவட்டங்களுக்கு இன்று அதிகனமழைக்கான சிவப்பு எச்சரிக்கை விடுக்கப்பட்டுள்ளது.
இதுதொடர்பாக சென்னை வானிலை ஆய்வு மையம் வெளியிட்ட செய்திக்குறிப்பு….
மத்திய கிழக்கு,அதை ஒட்டிய தென்கிழக்கு வங்கக்கடல் பகுதிகளில் நிலவிய காற்றழுத்தத் தாழ்வுப் பகுதி ஆழ்ந்த காற்றழுத்த தாழ்வுப் பகுதியாக வலுப்பெற்றுள்ளது.இது மேலும் வலுப்பெற்று காற்றழுத்தத் தாழ்வு மண்டலமாக அதே பகுதிகளில் நிலவக்கூடும்.
மேலும் இது மேற்கு,வடமேற்கு திசையில் நகர்ந்து வலுப்பெற்று,25 ஆம் தேதி (இன்று) ஆழ்ந்த காற்றழுத்தத் தாழ்வு மண்டலமாகவும்,26 ஆம் தேதி (நாளை) மத்திய மேற்கு வங்கக்கடல் பகுதிகளில் புயலாகவும் மாறக்கூடும். இது தொடர்ந்து வலுப்பெற்று மத்திய மேற்கு வங்கக்கடல் பகுதிகளில் ஆந்திரக் கடலோரப் பகுதிக்கு அருகே 28 ஆம் தேதி காலை நகர வாய்ப்பு உள்ளது.
இதன் காரணமாக இன்று தேனி,திண்டுக்கல்,மதுரை மாவட்டங்களில் ஓரிரு இடங்களில் இடி,
மின்னல்,பலத்தகாற்றுடன் அதிகனமழை (சிவப்பு எச்சரிக்கை) பெய்யக்கூடும்.கடலூர்,மயிலாடுதுறை,
நாகப்பட்டினம்,திருவாரூர்,தஞ்சாவூர்,புதுக்கோட்டை,அரியலூர்,பெரம்பலூர்,திருச்சி,கரூர்,நீலகிரி,கோவை,
திருப்பூர்,சிவகங்கை ஆகிய மாவட்டங்கள்,காரைக்கால் பகுதிகளிலும் ஓரிரு இடங்களில் இடி,மின்னல்,
பலத்த காற்றுடன் கனமுதல் மிக கனமழை (ஆரஞ்சு எச்சரிக்கை) பெய்யக்கூடும்.
சென்னை,திருவள்ளூர்,செங்கல்பட்டு,காஞ்சிபுரம்,விழுப்புரம்,கள்ளக்குறிச்சி,வேலூர்,இராணிப்பேட்டை,
திருப்பத்தூர்,திருவண்ணாமலை,நாமக்கல்,சேலம்,தருமபுரி,கிருஷ்ணகிரி,ஈரோடு,விருதுநகர்,கன்னியாகுமரி ஆகிய மாவட்டங்களில் கனமழையும்,தென்காசி,தூத்துக்குடி,இராமநாதபுரம்,திருநெல்வேலி ஆகிய மாவட்டங்களில்
மிதமான மழையும் பெய்யக்கூடும்.
26 ஆம் தேதி (நாளை) சிவகங்கை,இராமநாதபுரம்,புதுக்கோட்டை ஆகிய மாவட்டங்களில் ஓரிரு இடங்களில் இடி, மின்னல்,பலத்த காற்றுடன் கன முதல் மிக கனமழை பெய்யக்கூடும்.நீலகிரி,கோவை,தேனி,மதுரை,திண்டுக்கல், விருதுநகர்,தென்காசி,திருநெல்வேலி,கன்னியாகுமரி,தூத்துக்குடி ஆகிய மாவட்டங்களில் கனமழையும்,மற்ற மாவட்டங்களில் மிதமான மழையும் பெய்யக்கூடும்.
சென்னை மற்றும் புறநகர் பகுதிகளில் இன்று வானம் மேகமூட்டத்துடன் காணப்படும்.நகரின் ஒருசில பகுதிகளில் இடி,மின்னலுடன் மிதமானது முதல் கனமழை பெய்ய வாய்ப்பு உள்ளது.
இவ்வாறு அதில் கூறப்பட்டுள்ளது.
