இந்திய ஒன்றியத்தில் மாநிலங்கள் மற்றும் யூனியன் பிரதேசங்களில் 31 முதலமைச்சர்கள் உள்ளனர். இதில் மேற்குவங்க முதலமைச்சர் மம்தா, டெல்லி முதலமைச்சர் அடிசி ஆகியோர் மட்டுமே பெண்கள்.
இந்த நிலையில் ஒவ்வொரு முதலமைச்சருக்கும் உள்ள சொத்து மதிப்பு குறித்து ஜனநாயகத்திற்கான சீர்திருத்த சங்கம் அறிக்கை வெளியிட்டுள்ளது.
அதில் நாட்டிலேயே அதிக சொத்து மதிப்புடன் ஆந்திரா முதலமைச்சர் சந்திரபாபுநாயுடு முதல் இடத்தில் உள்ளார்.
சந்திரபாபு நாயுடுவுக்கு ரூ.931 கோடிக்கு மேல் சொத்துகள் உள்ளன.
அருணாச்சலபிரதேச முதலமைச்சர் பெமா காண்டு ரூ.332 கோடி சொத்துகளுடன் இரண்டாவது பெரிய பணக்கார முதலமைச்சராகவும், கர்நாடகாவின் சித்தராமையா ரூ. 51 கோடிக்கு மேல் சொத்துகளுடன் பட்டியலில் மூன்றாவது இடத்தில் உள்ளார்.
அதேசமயம் மேற்கு வங்க முதலமைச்சர் மம்தா பானர்ஜி வெறும் ரூ.15 இலட்சம் சொத்துடன் ஏழை முதல்வராக உள்ளார். காஷ்மீர் முதலமைச்சர் உமர் அப்துல்லா ரூ.55 இலட்சம் சொத்துகளுடன் ஏழை முதல்வர் பட்டியலில் இரண்டாவது இடத்திலும், கேரள முதல்வர் பினராயி விஜயன் ரூ.1 கோடியுடன் 3 ஆவது இடத்திலும் உள்ளனர். நாட்டில் உள்ள 31 முதலமைச்சர்களின் மொத்த சொத்து மதிப்பு ரூ.1,630 கோடி.
முதலமைச்சரின் சராசரி சொத்து மதிப்பு ரூ.52.59 கோடியாக உள்ளது. இந்தியாவின் தனிநபர் நிகர தேசிய வருமானம் 2023-2024 இல் தோராயமாக ரூ. 1,85,854 ஆக இருந்தபோது, ஒரு முதலமைச்சரின் சராசரி வருமானம் ரூ. 13,64,310 ஆகும். இது இந்தியாவின் சராசரி தனிநபர் வருமானத்தை விட 7.3 மடங்கு அதிகம்.
மேலும் 13 முதலமைச்சர்கள் மீது கிரிமினல் வழக்குகளும், 10 முதலமைச்சர்கள் மீது கொலை முயற்சி, கடத்தல், லஞ்சம் மற்றும் கிரிமினல் மிரட்டல் உள்ளிட்ட கடுமையான கிரிமினல் வழக்குகளும் உள்ளன.
சொத்து மதிப்பில் முதல் 10 முதலமைச்சர்கள்…
1 ஆந்திரா சந்திரபாபுநாயுடு ரூ.931கோடி
2 அருணாச்சல் பெமாகாண்டு ரூ.332 கோடி
3 கர்நாடகா சித்தராமையா ரூ.51 கோடி
4 நாகாலாந்து நெய்புரியோ ரூ.46 கோடி
5 மத்தியபிரதேசம் மோகன்யாதவ் ரூ.42 கோடி
6 புதுச்சேரி ரங்கசாமி ரூ.38 கோடி
7 தெலங்கானா ரேவந்த்ரெட்டி ரூ.30 கோடி
8 ஜார்க்கண்ட் ஹேமந்த்சோரன் ரூ.25 கோடி
9 அசாம் ஹிமந்தா பிஸ்வா சர்மா ரூ.17 கோடி
10 மேகாலயா கான்ராட் சங்மா ரூ.14 கோடி
இவ்வாறு அதில் கூறப்பட்டுள்ளது.
