நடிகர் விஜய் முதல்வரானதை தொடர்ந்து, நடிகர் தனுஷும் அரசியலில் ஆர்வம் காட்டி வருகிறார்.அண்மையில்
கோவையில் நடைபெற்ற கூட்டத்தில், அகில இந்திய தனுஷ் இரசிகர் மன்றம் என்ற அமைப்பின் பெயர் ‘தனுஷ் நற்பணி இயக்கம்’ என மாற்றப்பட்டது.புதிய இலச்சினை மற்றும் கொடியும் அறிமுகம் செய்யப்பட்டன.
இதற்கிடையே,தில்லிக்குச் சென்ற தனுஷ், அங்கு பாஜக தலைவர்கள் சிலரை சந்தித்துப் பேசியதாகவும்,‘தமிழக எழுச்சிக் கழகம்’ என்ற பெயரில் புதிய கட்சி தொடங்கத் திட்டமிட்டுள்ளதாகவும் தகவல்கள் வெளியாகின.
இந்நிலையில்,சென்னை பழைய மகாபலிபுரம் சாலையில் உள்ள செம்மஞ்சேரி தனியார் கல்லூரியில் தனுஷ்
நற்பணி இயக்கத்தின் மகளிர் அணி நிர்வாகிகள் சந்திப்பு நிகழ்ச்சி நேற்று நடைபெற்றது.
இந்நிகழ்ச்சியில் கலந்துகொண்ட,தனுஷை வரவேற்று கல்லூரி வளாகம் முழுவதும் வண்ணமயமான வரவேற்புப் பதாகைகள்,வெட்டுருக்கள் வைக்கப்பட்டிருந்தன.‘பெண்களின் குரல் உயர்ந்தால்தான் சமூகத்தின் எதிர்காலமும் உயரும்’,‘எங்கள் அன்பின் அண்ணன் தனுஷ்,எங்கள் தலைவரே’ என்பது போன்ற வாசகங்கள் அவற்றில் இடம்பெற்றிருந்தன.
தமிழகம் முழுவதும் இருந்து 5,000-க்கும் மேற்பட்ட பெண்கள் இதில் பங்கேற்றதாகக் கூறப்படுகிறது.நிகழ்வில் கலந்துகொண்டவர்களுக்கு கோழி பிரியாணி மதிய விருந்தாக அளிக்கப்பட்டது.அனைவருக்கும் ஒரு வெள்ளி காமாட்சி விளக்கும் பரிசாக வழங்கப்பட்டது.
வேட்டி, சட்டை அணிந்து நிகழ்ச்சியில் பங்கேற்ற தனுஷ்,வந்திருந்த பெண்களைச் சந்தித்து கலந்துரையாடினார்.அனைவரிடமும் தனித்தனியாகப் பேசியதுடன் புகைப்படமும் எடுத்துக்கொண்டாராம்.அனைவரையும் சந்தித்ததில் மகிழ்ச்சி.அனைவரும் நன்கு படித்து வாழ்க்கையில் வெற்றி பெறவேண்டும் என்று மாணவர்களுக்கும் அறிவுறுத்தினார்.நிகழ்ச்சியின்போது ஒரு பாடலும் பாடியுள்ளார்.
இதைத் தொடர்ந்து,2031 தமிழக சட்டமன்றத் தேர்தலில் போட்டியிட அவர் தயாராகிவருகிறார் என்று சொல்லிக்கொண்டிருந்தவர்கள் எல்லாம்,அவர் இன்னும் ஆறு மாதங்களில் வரவிருக்கிற உள்ளாட்சித் தேர்தலிலேயே போட்டியிடவிருக்கிறார்.அதனால்தான் இரசிகர்மன்றத்தை நற்பணி மன்றம் என மாற்றி அதன்முலம் பல சந்திப்புகளை நடத்தத் தொடங்கியிருக்கிறார் என்கிறார்கள்.
