அமெரிக்காவைச் சேர்ந்த பங்குச் சந்தை ஆய்வு நிறுவனமான ‘ஹிண்டன்பர்க்’ கடந்த 10-ம்தேதி வெளியிட்ட அறிக்கையில், ‘இந்திய பங்குச் சந்தை ஒழுங்குமுறை வாரியமான செபியின் தலைவர் மாதபி, அவரது கணவர் தவல் ஆகியோர் அதானியின் சகோதரர் வினோத் அதானி தொடர்புடைய போலி நிறுவனத்தில் பங்குகளை வைத்திருந்தனர். இதன் காரணமாகவே சந்தேகத்துக்குரிய நிறுவனங்கள் மீது செபி நடவடிக்கை எடுக்கவில்லை’ என்று கூறப்பட்டு உள்ளது. இந்த குற்றச்சாட்டு உண்மைக்கு புறம்பானது என்று செபி தலைவர் மாதபி விளக்கம் அளித்துள்ளார்.
ஹிண்டன்பர்க் விவகாரத்தில் அமெரிக்க தொழிலதிபர் ஜார்ஜ் சோரஸ் (94) மீது பாஜக பகிரங்கமாக குற்றம்சாட்டி உள்ளது. ஓபன் சொசைட்டி ஃபவுண்டேஷன் என்ற பெயரில் அறக்கட்டளை நடத்தி வரும் இவர், பல்வேறு நாடுகளின் அரசியலில் திரைமறைவாகச் செயல்பட்டு ஆட்சி மாற்றத்தை ஏற்படுத்தி வருவதாகக் கூறப்படுகிறது. இதற்காக ஓராண்டில் அவர் ரூ.12,000 கோடி வரை செலவிடுவதாகவும், இந்தியா உட்பட 120 நாடுகளின் அரசியலில் அவர் தலையிட்டு வருவதாகவும் தகவல்கள் வெளியாகி உள்ளன.வங்கதேசத்தில் தற்போது ஆட்சி மாற்றம் ஏற்பட்டதற்கும் இவர்தான் முக்கிய காரணம் என்று கூறப்படுகிறது.சோரஸ் ஓர் ஆபத்தான பணக்காரர் என்று பாஜக தலைவர்கள் விமர்சித்துள்ளனர்.
இதுகுறித்து பாஜக மூத்த தலைவர் இரவிசங்கர் பிரசாத் நேற்று கூறியதாவது….
அமெரிக்காவைச் சேர்ந்த தொழிலதிபர் ஜார்ஜ் சோரஸ், இந்தியாவுக்கு எதிராக அவதூறு பிரச்சாரத்தில் ஈடுபட்டு வருகிறார். ஹிண்டன்பர்க் நிறுவனத்துக்கு அவரே பெருமளவில் நிதியுதவி செய்கிறார். அவரது தூண்டுதலின் பேரில் ஹிண்டன்பர்க் நிறுவனம் இந்தியாவுக்கு எதிராகச் செயல்படுகிறது.
தொழிலதிபர் ஜார்ஜ் சோரஸின் ஏஜென்டாக இராகுல் காந்தி செயல்படுகிறார். பிரதமர் மோடி மீதான வெறுப்பால் தாய்நாட்டுக்கு எதிராக இராகுல் செயல்படுகிறார். அரசியல் ஆதாயத்துக்காக சொந்த நாட்டின் நலனுக்கு எதிராக காங்கிரசுக் கட்சி செயல்படுகிறது.
இவ்வாறு இரவிசங்கர் பிரசாத் கூறினார்.
பாஜகவின் இக்கூற்றைத் தொடர்ந்து, வங்கதேசத்தில் தற்போது ஆட்சி மாற்றம் நடந்தது போல இந்தியாவிலும் நடத்த ஜார்ஜ்சோரஸ் திட்டமிடுகிறார் என்று பாஜகவினரே சொல்கின்றனர்.இதிலிருந்து இந்தியாவிலும் விரைவில் ஆட்சி மாற்றம் நடக்கும் என்பதை அவர்களே ஒப்புக்கொள்வதாக எதிர்க்கட்சியினர் கூறிவருகின்றனர்.
