நீலகிரி கூடலூரில் பறிபோகும் தமிழர் நிலம் – உணர்வாளர் தரும் அதிர்ச்சித் தகவல்

தமிழக, கேரள எல்லையான கூடலூரில் மலையாளிகள் ஆதிக்கம் அதிகம் என்று பல்வேறு நிகழ்வுகள் மூலம் சொல்லப்பட்டுவந்தது. தற்போது அங்கு நடைபெற்றுள்ளதாகச் சொல்லப்படும் நிகழ்வு தமிழக எல்லைக் கோட்டையே கேள்விக்குள்ளாக்குவதாக இருக்கிறது. தமிழக எல்லைக்குள் இருக்கும் ஒரு கட்டிடத்துக்கு கேரள மின்வாரியம் மின் இணைப்பு கொடுத்துள்ளது என்னும் அதிர்ச்சியான தகவலை பிரகாசு என்பவர் முகநூலில் எழுதியுள்ளார்.

அவருடைய பதிவில்,

நீலமலை மாவட்டம் கூடலூர் சட்டமன்ற தொகுதிக்குட்பட்ட, தாளூர் தமிழக கேரள எல்லை. ஒரு எல்லை சோதனைச்சாவடி, ஒரு ஆற்றுப்பாலம் இது மட்டும் தான் தமிழ்நாடு கேரளாவிற்கு இடைப்பட்ட பகுதி. மொழிவழி மாநிலம் பிரிக்கப்பட்ட நேரத்தில் ஓடுகிற ஆற்றில் ஒரு பாதி கேரளாவிற்கும் ஒருபாதி தமிழ்நாட்டிற்கும் என ஆற்றை மையமாக வைத்து எல்லை பிரித்தார்கள். ஆற்றை ஒட்டிய பகுதியில் தான் இன்று ஒரு புதிய சிக்கல்.
கேராளாவில் இருந்து தமிழ்நாட்டில் தொழில் செய்ய வந்த ஏ.பி.பி என்ற ஒப்பந்தகாரர் ஒருவர் நீலமலை மாவட்டத்தில் பல நெடுஞ்சாலைகளையும், சிறு சிறு சாலைகளையும் ஒப்பந்த அடிப்படையில் தனது கட்டுப்பாட்டில் கொண்டுவந்து சாலை பணிகளை மேற்கொண்டார்.
தற்போது தாளூர் பகுதியில் ஒரு பெரிய வணிக வளாகத்தை கட்டி கடைகளை வாடகைக்கு விட்டார். ஆனால் தமிழ்நாட்டிற்கு சொந்தமான இடத்தை கேரளாவிற்கு சொந்தம் எனக்கூறி ஆவணம் தயாரித்து, பட்டா எண் பெற்றதோடு, கேரள மின்வாரியத்திலிருந்து மின்னிணைப்பும் பெற்றிருக்கிறார். எல்லைக்கோட்டிலிருந்து 50 மீட்டர் உள்ளே தமிழர் நிலத்தை கேரளாவிற்கு உரியது என சொந்தம் கொண்டாடி வருகிறான். இதற்கு வருவாய்த்துறை, கிராமநிர்வாக அலுவலர், காவல்துறை என அதிகாரிகளின் ஆதரவு வேறு. நாம் அவ்விடத்தை ஆய்வு செய்தபோது தான் தெரியவந்தது தமிழ்நாட்டிற்குள் பல இடங்களில் கேரள அரசு பட்டா கொடுத்திருப்பது. வெகு விரைவில் மாபெரும் போராட்டத்தை முன்னெடுக்க இருக்கிறோம்.
இனி ஒருபிடி மண்ணையும் இழக்க இயலாது.

என்று குறிப்பிட்டுள்ளார்.

இதன் உண்மைத்தன்மையை ஆதாரத்தோடு அறியும் முயற்சியில் நாம் இறங்கியிருக்கிறோம். இது தொடர்பான ஆதாரம் உள்ளவர்கள் தொடர்பு கொள்ளுங்கள்.

4 Comments

  1. தமிழர் கையிலிருந்து பறிபோகும் நிலையில் தாளூர்.

    நீலமலை மாவட்டம் கூடலூர் சட்டமன்ற தொகுதியின் கடைக்கோடி எல்லை தாளூர். ஒரு சோதனைச்சாவடியை கடந்தால் கேரளா. எல்லை என்பதாலோ என்னவோ அங்கு மலையாளத்தின் தாக்கம் அதிகம். அது தமிழர் பகுதி என்பதற்கான அடையாளமே அங்கு இடையிடையே பறக்கும் புலிக்கொடிதான். மற்றபடி பெருவணிக நிறுவனங்கள், கடைகள் என அனைத்தும் கேரள மக்களே கோலோச்சும் இடமாகவே இருக்கிறது. இரண்டு மாநிலங்களிலும் அரசின் சலுகைகள் பெறுபவர்களும் அதிகம். சிலர் இங்கேயே பூர்வக்குடிகளாக வாழ்பவர்களும் இருக்கிறார்கள். ஆனால் தற்போது இங்கு பணபலத்துடன் இருப்பவர்கள் பெரும்பாலும் ஒருசில வருடங்களுக்குள்ளாக வந்து குடியேறியவர்கள். அவர்களில் ஓரிரு ஒப்பந்தகாரர்கள் குறிப்பிட்டு சொல்ல வேண்டியவர்கள். அந்த ஒப்பந்தகாரர்களில் ஒருவர்தான் தாளூர் பகுதியில் பணபலத்தோடு நிற்கும் ஏ.பி.பி. எல்லைக்கோடு வரையறுக்கும் போது, ஒரு ஆற்றின் மையப்பகுதியை நீள்வெட்டாக, ஆற்றின் ஒரு பாகம் கேரள எல்லை தொடங்கும் பகுதியாகவும், மறுபாகம் தமிழ்நாட்டு எல்லை தொடங்கும் இடமாகவும் அறிவிக்கப்பட்டது.
    குறிப்பிட்ட ஒரு இடைவெளியில் இரு மாநிலங்களும் சோதனைச்சாவடி அமைத்திருக்கிறார்கள். இத்தனை ஆண்டுகாலம் சேரங்கோடு ஊராட்சிக்கு வரிசெலுத்தப்பட்டுவந்த தாளூர் பகுதியில் கடந்த ஆண்டு புதிதாய் ஒரு கட்டிடம் கட்டப்பட்டது. அதுவரையிலும் சிக்கல் இல்லை. ஆனால் முறைகேடான வழியில் கேரள அரசிடம் பட்டா பெற்று, கேரள மின்வாரியம் மின்சாரமும் வழங்கியிருக்கிறது. இரண்டு மாதங்களுக்கு முன்பு தமிழ்நாடு மின்னிணைப்பு பெற்றிருந்த கட்டிடம் இன்று எல்லையை கடந்து மின் கம்பம் நடப்பட்டு கேரளாவிலிருந்து மின்சாரம் வருகிறது. அப்படியானால் சேரங்கோடு ஊராட்சியில் மின்சாரம் எடுக்க தடையில்லா சான்று கொடுக்கப்பட்டிருக்க வேண்டும். எப்படி கொடுக்கப்பட்டது? யார் கொடுத்தார்கள்? கேரள மின்வாரியம் மின்சாரம் வழங்க தடையில்லா சான்று வழங்கியிருக்க வேண்டும், தமிழ்நாட்டுக்குள் மின்சார இணைப்பை கேரளா எப்படி கொடுத்தது? இன்னும் விடை தெரியாத பல கேள்விகள் இருக்கிறது. தமிழகத்தின் மைல் கல் பிடுங்கி எறியப்பட்டு அந்த இடமும் தற்போது இன்னொரு கட்டிடத்திற்கு தயாராகி வருகிறது. . ஆனால்
    கட்டிடம் கட்டப்பட்ட இடம் கேரளாவிற்கு சொந்தம் என கட்டிட உரிமையாளரின் ஆதரவாளர்கள் வரிந்து கட்டிக்கொண்டு வருகிறார்கள். எல்லைக்கோட்டிலிருந்து 50 மீட்டர் தமிழ்நாட்டுக்கு உள்ளே உள்ள பகுதி எப்படி கேரளாவிற்கு சொந்தம் என நாங்கள் கேள்வி எழுப்பிய போது குறிப்பிட்ட ஒரு பகுதியை கையைக்காட்டி அதெல்லாம் கேரளா பட்டா தான் என்று எங்களிடம் சொல்கிறார்கள். அதிர்ச்சி என்னவென்றால் அவர்கள் கைக்காட்டிய பகுதி எல்லைக்கோட்டிலிருந்து சுமார் 500 மீட்டருக்கு அப்பால் இருந்தது.
    கடுமையான போராட்டங்கள் இல்லையெனில் தேவிகுளம், பீர்மேடு, மூணாறு போல தாளூரும் இனி நமக்கில்லை என்ற நிலை வந்துவிடும்.
    மிகப்பெரும் போராட்டங்களை முன்னெடுக்காமல் விட்டால் தாளூர் கைநழுவிப்போகும் என்பது மட்டும் உறுதி.

    தமிழ்நாடு அரசு கவனிக்குமா? இல்லை மௌனம் காக்குமா?

Leave a Response