முத்தையா முரளிதரன் மலையகத் தமிழரே அல்ல – தியாகு சொல்லும் புதிய தகவல்

தமிழ்த்தேசிய விடுதலை இயக்கத்தின் நிறுவனர் தியாகு வெளியிட்டுள்ள புதிய தகவல்…..

முத்தையா முரளிதரன் வர்த்தகச் சமூகத்தைச் சார்ந்ததவரே தவிர மலையகத் தமிழரல்ல. 1920- ம் ஆண்டு, இவரது தாத்தாவான பெரியசாமி சின்னச்சாமி தமிழகத்திலிருந்து வர்த்தகம் செய்வதற்காக இலங்கைக்கு வந்தார். சிறிது காலத்தில், அவர் இந்தியாவிற்குத் திரும்பிச் சென்றுவிட்டார். ஆனால் முரளிதரனின் அப்பா முத்தையா கண்டியிலிருந்து வியாபாரத்தைக் கவனித்துக்கொண்டார்.

கண்டியின் குண்டசாலைப் பகுதியில், முத்தையா பிஸ்கட் தயாரிக்கும் தொழிற்சாலையை நடத்தி வந்தார். 1983-ம் ஆண்டு, அந்தத் தொழிற்சாலை சிங்கள-பௌத்த பேரினவாதிகளின் வன்முறையில் தீவைத்து எரிக்கப்பட்டது. தீவைப்பின் போது தொழிற்சாலையோடு அமைந்துள்ள வீட்டிலிருந்து, தொழிலாளர்களின் உதவியோடு காப்பாற்றப்பட்டார் முரளிதரன். இந்தியாவிலிருந்து குடியேறிய வியாபாரிகளான ஞானம் போன்றவர்களின் வியாபார நிலையங்கள் தாக்கப்பட்ட போதும், அவர்களது அரசு சார்பு நிலைப்பாட்டில் எந்த மாற்றமும் ஏற்படவில்லை.

முத்தையா முரளிதரன் இலங்கையில் உள்ள உயர்குடிப் பள்ளிகளில் ஒன்றான சென்ட் அந்தனிஸில் கல்வி கற்றார். தமிழர்களை விட சிங்கள இளைஞர்களே இவரின் நண்பர்களாக இருந்தனர். தமிழர்கள் மத்தியில் கூட சிங்கள மொழியிலேயே பேசினார். தன்னை தமிழராக அடையாளப்படுத்துவதை எப்போதும் முரளி விரும்பியதில்லை.
மலையகத் தமிழ்த் தேசிய இனத்தோடு இவர்களுக்கு எந்த இணைப்பும் இருந்ததில்லை. இவர்களில் பெரும்பகுதியினர் இலங்கையில் குடியுரிமை பெற்றிருந்தாலும், தங்களது இந்தியக் குடியுரிமையையும் ஒருபுறம் பாதுகாத்தே வந்தனர். முரளிதரன் மட்டுமன்றி அவரது முழுக் குடும்பமும் இந்தியக் குடியுரிமையைப் பேணிகாத்து வருகிறது. முரளிதரன் இந்தியா வரும் பொழுது, இந்திய கடவுச் சீட்டில் இந்தியராகவே சென்று வருகிறார்.

இவ்வாறு அவர் கூறியுள்ளார்.

Leave a Response