காய்கறி மளிகைக் கடைகள் திறக்கும் நேரம் குறைப்பு – தமிழக முதல்வர் அறிவிப்பு

நாடு முழுவதும் ஊரடங்கு அமலில் உள்ளது. இதனால் பொதுமக்கள் அத்தியாவசியத் தேவை தவிர்த்து, பிற விசயங்களுக்காக வெளியே செல்லாமல் வீடுகளிலேயே முடங்கிக் கிடக்கின்றனர்.

அத்தியாவசியப் பொருட்களான உணவு மற்றும் காய்கறி உள்ளிட்ட மளிகைப் பொருட்கள் போன்றவற்றை வாங்குவதற்கான காலநேரம் பற்றிய அறிவிப்பினை தமிழக அரசு வெளியிட்டது.

இதன்படி, அத்தியாவசியப் பொருட்களை விற்பனை செய்வதற்கான காலநேரம் காலை 6 மணியில் இருந்து மதியம் 2.30 மணிவரை இருக்கும் என்று முன்பு அறிவிக்கப்பட்டு இருந்தது.

இந்த நிலையில், இந்த காலஅவகாசம் குறைக்கப்பட்டு உள்ளது என தமிழக அரசு புதிய அறிவிப்பு வெளியிட்டு உள்ளது.

அதனால், பொதுமக்கள் காலை 6 மணி முதல் மதியம் ஒரு மணிவரை தங்களுக்குத் தேவையான அத்தியாவசியப் பொருட்களை வாங்கிக் கொள்ள அனுமதிக்கப்பட்டு உள்ளது. பொதுமக்கள் அத்தியாவசியப் பொருட்களை வாங்க வரும்போது சமூக இடைவெளியைப் பின்பற்ற வேண்டும்.

அரசின் விதிமுறைகளை மீறுவோர் மீது கடும் நடவடிக்கை எடுக்கப்படும் என்று முதலமைச்சர் பழனிச்சாமி எச்சரிக்கை விடுத்து உள்ளார்.நோய்த் தொற்று உள்ளவர்களுக்கு சிகிச்சை அளிக்கும்படி தனியார் மருத்துவமனைகளுக்கு அவர் அறிவுரை வழங்கியுள்ளார்.

இதேபோன்று, கொரோனா வைரஸ் ஜாதி, மத வேறுபாடின்றி அனைவரையும் தாக்கக் கூடியது. அரசின் நடவடிக்கைகளுக்கு முழு ஒத்துழைப்பு வழங்குவோம் என மதத் தலைவர்கள் ஒப்புதல் அளித்து உள்ளனர். கொரோனா பாதிப்புக்கு மதச் சாயம் பூசுவது தவிர்க்கப்பட வேண்டும். மதம் சார்ந்த கூட்டங்களைத் தவிர்த்து, சமூக இடைவெளியைக் கடைபிடிக்க வேண்டும் என்றும் அவர் வேண்டுகோள் விடுத்துள்ளார்.

Leave a Response