எட்டாம் வகுப்பு மாணவர்களுக்கு இன்னொரு சுமை – அரசு அறிவிப்பால் அதிர்ச்சி

தமிழகத்தில் மாநில பாடத்திட்டத்தின் கீழ் செயல்படும் அரசு மற்றும் அரசு உதவி பெறும் பள்ளிகளில், இந்த ஆண்டு 5 மற்றும் 8 ஆம் வகுப்புகளுக்கான பொதுத்தேர்வு நடைபெறும் என்று பள்ளிக்கல்வித் துறை அறிவித்தது.

இந்த அறிவிப்பு மாணவர்களுக்கு பெரும் மன அழுத்தத்தை ஏற்படுத்தக்கூடியதாக அமையும் என்று கல்வியாளர்கள் தரப்பில் குற்றம் சாட்டப்பட்டு வருகிறது.

இதற்கிடையில் நேற்று பள்ளிக்கல்வித்துறை அமைச்சர் செங்கோட்டையன் செய்தியாளர்களிடம் பேசிய போது, இந்த ஆண்டு நிச்சயமாக 5 மற்றும் 8 ஆம் வகுப்புகளுக்கு பொதுத்தேர்வு நடைபெறும் எனவும் அடுத்த ஆண்டு தேர்வை ரத்து செய்வது குறித்து பரிசீலிக்கப்படும் என்றும் தெரிவித்தார்.

இந்நிலையில் இன்று பள்ளிக்கல்வி துறை வெளியிட்டுள்ள அறிவிப்பின்படி 8 ஆம் வகுப்பு மாணவர்களுக்கு தினமும் 1 மணி நேரம் சிறப்பு வகுப்புகள் நடத்த வேண்டும் என்று உத்தரவிடப்பட்டுள்ளது.

ஈரோடு மாவட்ட முதன்மைக் கல்வி அலுவலர் இது குறித்த சுற்றறிக்கை ஒன்றை வெளியிட்டுள்ளார். அனைத்து மாவட்ட முதன்மைக் கல்வி அலுவலர்களும் இதேபோன்று உத்தரவு பிறப்பித்துள்ளதாகவும் தகவல் வெளியாகியுள்ளது.

கலவியாளர்களின் கருத்துகளை ஏற்று பொதுத்தேர்வை இரத்து செய்வார்கள் என்று எதிர்பார்த்தால், மேலும் ஒரு சுமையாக ஒரு மணி நேரம் கூடுதல் வகுப்பு என்று அறிவித்திருப்பது மாணவர்களையும் ஆசிரியர்களையும் அதிர்ச்சிக்குள்ளாக்கியுள்ளது.

Leave a Response