கட்சி பெயரைச் சொல்லிப் பழகுங்கள் – கமல் வேண்டுகோள்

கமல்ஹாசன் தனது அரசியல் பயணத்தை பிப்ரவரி 21,2018 அன்று காலை இராமேசுவரத்தில் இருந்து தொடங்கியுள்ளார்.மாலையில், மதுரை ஒத்தக்கடை மைதானத்தில் பொதுக்கூட்டம் நடந்தது. அதில் டெல்லி முதல்வர் அர்விந்த் கேஜ்ரிவாலுடன் கமல் கலந்திகொண்டார்.

5 கைகள் இணைந்த வெள்ளை நிறக் கொடியை ஏற்றிய கமல்ஹாசன் தன் கட்சியின் பெயர் ‘மக்கள் நீதி மய்யம்’ என்று அறிவித்தார். அதற்குப் பிறகு மேடையில் பேசிய கமல், ”இனி நமக்கு நிறைய கடமை இருக்கிறது. இது ஒருநாள் கொண்டாட்டம் அல்ல. கட்சிக்கு ‘மக்கள் நீதி மய்யம்’ என பெயரிட்டுள்ளோம். இனி தோழர்கள் கட்சிப் பெயரை சொல்லி சொல்லிப் பழகுங்கள்.

நான் உங்கள் கருவி, உங்கள் தலைவன் அல்ல. நாம் சமைக்க இருக்கும் மக்களாட்சியின் ஒரு பருக்கை சோற்றை உதாரணமாக்கி இருக்கிறேன். இந்த சோற்றுப் பருக்கையை தொட்டுப் பார்த்தால் ஊழலில் தோய்ந்த உங்களின் கை விரல் சுடும்” என்றார்.

தொடர்ந்து கமல்ஹாசன் பேசியதாவது:

”எங்கள் தண்டவாளமும் உங்கள் வண்டவாளமும் வெளிவரும் நாள் இன்று. 37 ஆண்டுகளாக அமைதியாக நற்பணி செய்த கூட்டத்தை நீங்கள் பார்த்தீர்கள். இன்று பேசும் நாள், நாளை செயல்படும் நாள்.

இங்கு பணத்திற்கு பஞ்சமில்லை, நல்ல மனதிற்குதான் பஞ்சம். எங்கள் நற்பணிகளுக்கு இடைஞ்சலாக சில அரசுகள் இருந்தன அதனை மறக்க மாட்டோம். நல்ல கட்சிக்கு வாக்களித்தீர்கள் என்றால் ஆண்டுக்கு ரூ.6000 இல்லை ரூ.6 லட்சம் கிடைத்திருக்கும். நாங்கள் சமூக சேவகர்களாக வந்துள்ளோம். செய்ய வேண்டியதை செய்தாலே போதுமானது.

கல்வியை தனியாரிடம் கொடுத்துவிட்டு மது வியாபாரத்தை அரசு நடத்துவது வாடிக்கையாகிவிட்டது. சாராயத்தை யார் வேண்டுமானாலும் விற்கலாம். கல்வியை அப்படி விடமுடியுமா? எல்லா தரப்பினருக்கும் தரமான கல்வி போய்ச் சேர வேண்டும்.

படித்த இளைஞர்கள் பலர் வேலைவாய்ப்பின்றி உள்ளார்கள். அதை மாற்ற முடியும். இளைஞர்களுக்கு வேலைவாய்ப்பு உருவாக்கப்படும்.

சாதி, மதம் அறவே நீக்கப்பட வேண்டும். ஊழலை குறைத்தால் மின்சாரம் வரும். நான் மட்டும் ஊழலை ஒழிக்க முடியாது; நீங்களும் வாருங்கள் சேர்ந்து ஊழலை ஒழிப்போம்.

எனக்கு வயது 63; நான் 40 வருட ஆட்சிக்காக வரவில்லை. மக்கள் நீதி மய்யத்தில் யாரும் நிரந்தர முதல்வராக இருக்க மாட்டார்கள். நாங்கள் ஆட்சிக்கு வந்தால் குவாட்டரும், ஸ்கூட்டரும் நீடிக்காது. இலவசம் இருக்காது. ஆனால், மற்றவர்களுக்கு ஸ்கூட்டர் வாங்கித் தரும் பொருளாதாரத்தை ஏற்படுத்துவேன்” என்று கமல் பேசினார்.

Leave a Response